விசாகப்பட்டினம்: ஆந்திர மாநிலம், விசாகப்பட்டினத்தில் முதலீட்டாளர்கள் மாநாடு-2026 நேற்று தொடங்கியது. 3 நாள் நடைபெறும் இதில் முக்கிய விருந்தினராக மத்திய அமைச்சர் பியூஷ் கோயல் கலந்து கொண்டார். மேலும், மத்திய அமைச்சர் ராம்மோகன் நாயுடு, ஆந்திர துணை முதல்வர் பவன் கல்யாண் மற்றும் 58 நாடுகளை சேர்ந்த நிறுவன சிஇஓக்கள், நிர்வாக இயக்குநர்கள் பங்கேற்றனர்.
மாநாட்டை தொடங்கி வைத்து ஆந்திர முதல்வர் சந்திரபாபு நாயுடு பேசியதாவது: என் தலைமையில் இதுவரை 8 முதலீட்டாளர்கள் மாநாடு நடந்துள்ளது. என் மீதுள்ள நம்பிக்கையில் பல நிறுவனங்கள் இங்கு தொழில் தொடங்க முன்வந்தது மகிழ்ச்சி அளிக்கிறது. 2024 ஜூன் மாதம் முதல் ரூ.22.6 லட்சம் கோடி முதலீடுகளுடன் 714 ஒப்பந்தங்கள் கையெழுத்தானது. இதில் ரூ.7.3 லட்சம் கோடி முதலீடுகள் தொழில் தொடங்கும் நிலையில் உள்ளது.
முதலீட்டாளர்களுக்கு உரிய பாதுகாப்பு சட்டத்தை இயற்றுவது மிக அவசியம். இதை மத்திய அமைச்சர் பியூஷ் கோயலிடம் என்னுடைய கோரிக்கையாக வைக்கிறேன். ஆட்சிகள் மாறும்போது இது ஒரு காழ்ப்புணர்வாக தொழிற்சாலைகள் மீது செயல்படுத்தப்படுகிறது.
இது தொடர்பாக ஆந்திர அமைச்சரவை மற்றும் பேரவை, மேலவைகளில் சட்டம் இயற்றி அனுப்பி வைக்கிறோம். இதனை தேசிய அளவில் சட்டம் இயற்றினால், இந்தியாவின் வளர்ச்சியை யாராலும் தடுக்க முடியாது. இவ்வாறு அவர் பேசினார். முதலீட்டாளர்களுக்கு நம்பிக்கையை வழங்குவதில், சந்திரபாபுவுக்கு நிகர் அவரே தான் என மத்திய அமைச்சர் பியூஷ் கோயல் தெரிவித்தார்.
