புதுடெல்லி: பிரதமர் நரேந்திர மோடியும், போலந்து பிரதமர் டொனால்டு டஸ்க்கும் நேற்று சந்தித்துப் பேசினர். அப்போது இருதரப்பு உறவை பலப்படுத்துவது தொடர்பாக ஆலோசிக்கப்பட்டது. பிரதமர் நரேந்திர மோடியின் அழைப்பின் பேரில், போலந்து பிரதமர் டொனால்டு டஸ்க் மூன்று நாள் அரசு முறைப் பயணமாக
நேற்று முன்தினம் இந்தியா வந்தார். இந்தப் பயணத்தின் தொடக்கமாக போலந்து பிரதமர் டஸ்க் ராஜ்காட்டில் உள்ள மகாத்மா காந்தி சமாதியில் அஞ்சலி செலுத்தினார். டெல்லியில் உள்ள ஹைதராபாத் இல்லத்தில் பிரதமர் நரேந்திர மோடியும் டொனால்டு டஸ்கும் நேற்று சந்தித்துப் பேச்சுவார்த்தை நடத்தினர். அப்போது இருதரப்பு
பிரதிநிதிகள் பங்கேற்றனர். இந்தியா-போலந்து இடையிலான இருதரப்பு உறவுகளின் அனைத்து அம்சங்களையும் ஆய்வு செய்வதற்கும், இரு நாடுகளின் செயல்திட்ட ரீதியிலான கூட்டாண்மையை மேலும் வலுப்படுத்துவதற்கான வழிகளை ஆராய்வதற்கும் இந்தப் பேச்சுவார்த்தை நடைபெற்றது.
இந்தியத் தரப்பு பிரதிநிதிகள் குழுவில் வெளியுறவு அமைச்சர் எஸ். ஜெய்சங்கர், தேசியப் பாதுகாப்பு ஆலோசகர் அஜித் தோவல், வெளியுறவுச் செயலர் விக்ரம் மிஸ்ரி ஆகியோர் இடம்பெற்றிருந்தனர். போலந்து பிரதமருடன் அவரது குழு உறுப்பினர்கள் பங்கேற்றனர். டெல்லியில் தனது நிகழ்ச்சிகளை முடித்துக் கொண்ட பின்னர், போலந்து பிரதமர் பெங்களூரு செல்கிறார். அங்கு தகவல் தொழில்நுட்பம், விண்வெளி, வணிகத் துறையினருடன் கலந்துரையாடுகிறார்.
பிரதமர் மோடியும், போலந்து பிரதமர் டொனால்டு டஸ்க்கும் கூட்டறிக்கை வெளியிட்டனர். அதில் கூறப்பட்டிருப்பதாவது: எல்லை தாண்டிய தீவிரவாதம் உட்பட அனைத்து வகையான தீவிரவாதத்துக்கும் கண்டனம் தெரிவிக்கிறோம். எந்தக் காரணத்துக்காகவும் தீவிரவாதத்தை நியாயப்படுத்த முடியாது. 2025 ஏப்ரல் 22 அன்று பஹல்காமில் நடந்த தாக்குதலுக்கு வன்மையான கண்டனம் தெரிவிக்கிறோம்.
ஐ.நா. பாதுகாப்பு கவுன்சிலின் 1267 குழு பட்டியலிட்டவை உள்ளிட்ட தீவிரவாதிகள், அமைப்புகளுக்கு எதிராக வலுவான, ஒருங்கிணைந்த நடவடிக்கை தேவை. தீவிரவாதப் புகலிடங்களையும் நிதி வலையமைப்புகளையும் ஒழிக்க அனைத்து நாடுகளும் தொடர்ந்து பணியாற்ற வேண்டும்.
ஐ.நா. பாதுகாப்பு கவுன்சிலில் இந்தியா உறுப்பினராவதற்கும், 2028-29 காலத்துக்கான தற்காலிக உறுப்பினர் பதவிக்கான இந்தியாவின் வேட்புமனுவுக்கும் போலந்து ஆதரவு தெரிவிக்கிறது. இந்தோ-பசிபிக் பகுதி சுதந்திரமாகவும் அமைதியாகவும் இருக்க வேண்டும். ஐ.நா. கடல்சார் சட்ட உடன்படிக்கை உள்ளிட்ட சர்வதேசச் சட்டத்தை மதிக்க வேண்டும். இந்தோ-பசிபிக் பெருங்கடல் முன்முயற்சியில் சேருமாறு போலந்தை இந்தியா அழைக்கிறது. ஜி20 பணிக்குழுக்களில் ஒத்துழைக்கவும் இரு தரப்பும் தயாராக உள்ளன. இவ்வாறு அதில் கூறப்பட்டுள்ளது.
