புதுடெல்லி: பிரதமர் மோடி கடந்த சனிக்கிழமை ஒரு புகைப்படத்தை இன்ஸ்டாகிராமில் வெளியிட்டார். அவர் வெளியிட்ட பதிவில், “எனது வீட்டுக்கு வந்த சின்னஞ்சிறு நண்பனுடன்...” என்று குறிப்பிட்டிருந்தார். அந்த புகைப்படம் வைரலாகப் பரவி வருகிறது.
பிரதமர் மோடியுடன் இருக்கும் சின்னஞ்சிறு நண்பன் யார் என்ற கேள்வி அனைவரையும் துளைத்தெடுத்தது. நீண்ட தேடலுக்குப் பிறகு அந்த சிறுவன் கேரளாவை சேர்ந்த பிரபல நடிகரும் பாஜக மூத்த தலைவருமான கிருஷ்ணகுமாரின் பேரன் நியோம் என்பது தெரியவந்துள்ளது. சில நாட்களுக்கு முன்பு கிருஷ்ணகுமார் தனது குடும்பத்துடன் பிரதமர் மோடியை சந்தித்துப் பேசினார்.
அப்போது கிருஷ்ணகுமாரின் மகள் தியா தனது மகன் நியோமுடன் பிரதமரை சந்தித்தார். குழந்தைகள் மீது அதிக பாசம் கொண்ட பிரதமர் மோடி, நியோமை தூக்கி கொஞ்சி மகிழ்ந்தார். அந்த புகைப்படத்தையே அவர் தனது வெளியிட்டிருக்கிறார். தியாவும் அவரது கணவர் அஸ்வினும் கேரளாவின் பிரபல யூ டியூபர்களாக உள்ளனர்.
தனது கர்ப்பம் முதல் பிரசவம் வரையிலான முழு பயணத்தையும் யூ டியூப் சேனலில் தியா ஆவணப்படுத்தியிருக்கிறார். கடந்த ஆண்டு செப்டம்பரில் தனது குழந்தையின் முகத்தை யூ டியூபில் மக்களுக்கு அவர் அறிமுகம் செய்தார். தற்போது பிரதமர் நரேந்திர மோடியால் குழந்தை நியோம் உலகம் முழுவதும் பிரபலமாகிவிட்டான்.
