

புதுடெல்லி: கடந்த கால அரசுகள் பழங்குடியின மக்களை புறந்தள்ளியதாகவும் அவர்கள் நலனில் துளியும் அக்கறை செலுத்தவில்லை என்றும் பிரதமர் நரேந்திர மோடி குற்றம்சாட்டி உள்ளார்.
சுதந்திர போராட்ட தலைவர் பிர்சா முண்டாவின் பிறந்த நாள், பழங்குடியினர் தினமாகக் கொண்டாடப்படுகிறது. இதையொட்டி மகாராஷ்டிராவின் கட்சிரோவில் நேற்று நடைபெற்ற விழாவில் பிரதமர் நரேந்திர மோடி காணொலி வாயிலாக பங்கேற்றார். அப்போது அவர் பேசியதாவது: பழங்குடியினர் தினத்தை ஒட்டி நாடு முழுவதும் 170 திட்டங்கள் தொடங்கப்பட்டு உள்ளன. 70 திட்டங்களுக்கு அடிக்கல் நாட்டப்பட்டு உள்ளது. இந்த திட்டங்களின் மொத்த மதிப்பு ரூ.3,000 கோடி ஆகும். இவற்றின் மூலம் பழங்குடியின மக்கள் பெரிதும் பலன் அடைவார்கள்.
சமீபத்தில் இரு பெரிய சாதனைகளை படைத்து உள்ளோம். முதலாவது சாதனை சுமார் 50 கோடி மக்கள் வறுமையில் இருந்து மீண்டு உள்ளனர். 2-வது சாதனை, நக்சல், மாவோயிஸ்ட் தீவிரவாதம் ஒழிக்கப்பட்டு உள்ளது. இந்த இரு சாதனைகளும் பழங்குடி மக்களோடு மிகவும் நெருங்கிய தொடர்பு உடையவை ஆகும்.
கடந்த 2023-ம் ஆண்டில் ஜன்ஜாதி ஆதிவாசி நியாய மகா அபியான் தொடங்கப்பட்டது. இந்த திட்டத்தின் கீழ் பழங்குடியின மக்களுக்கு கான்கிரீட் வீடுகள் கட்டிக் கொடுக்கப்படுகிறது. மேலும் குடிநீர், சாலை மேம்பாடு, மருத்துவ வசதி, கல்வி, மின்சாரம், தொலைத்தொடர்பு தொடர்பான பல்வேறு திட்டங்கள் செயல்படுத்தப்பட்டு வருகின்றன. முத்ரா யோஜனா திட்டத்தின் கீழ் கடன் உதவி வழங்கப்படுகிறது. இதேபோல பழங்குடியின மக்களின் நலனுக்காக பல்வேறு திட்டங்கள் செயல்படுத்தப்பட்டு வருகிறது. இதனால் அவர்களின் வாழ்வாதாரம் மேம்பட்டிருக்கிறது.
கடந்த கால அரசுகள் பழங்குடியின மக்களை முழுமையாக புறந்தள்ளினர். அவர்களின் நலனில் துளியும் அக்கறை செலுத்தவில்லை. பழங்குடியின மக்கள் வசிக்கும் பகுதிகளில் நக்சல், மாவோயிஸ்ட் தீவிரவாதிகளின் ஆதிக்கம் அதிகமாக இருந்தது. இதன் காரணமாக மிக நீண்ட காலமாக தீவிரவாதிகளின் பிடியில் சிக்கித் தவித்தனர். ஒவ்வொரு வீடுகளில் இருந்தும் சிறுவர், சிறுமிகளை தீவிரவாதிகள் பிடித்துச் சென்றனர். இதை யாரும் தடுக்கவில்லை.
பாஜக அரசு பதவியேற்ற
பிறகு நக்சல், மாவோயிஸ்ட் தீவிரவாதத்தை ஒடுக்க பல்வேறு நடவடிக்கைகள் எடுக்கப்பட்டன. இதன் காரணமாக நக்சல், மாவோயிஸ்ட் பாதிப்பு இல்லாத இந்தியா உருவாகி உள்ளது. தீவிரவாதம் ஒழிந்த பிறகு பழங்குடியினர் பகுதிகளில் அடிப்படை வசதிகள் மேற்கொள்ளப்பட்டு வருகின்றன. அவர்களுக்கு தரமான கல்வி கிடைக்கிறது. வேலைவாய்ப்புகள் பெருகி வருகின்றன. பழங்குடியின மக்கள் மத்தியில் புதிய நம்பிக்கை பிறந்துள்ளது. இவ்வாறு அவர் பேசினார்.