புதுடெல்லி: உத்தர பிரதேசத்தின் பிலிபித் தொகுதி வாக்காளர் பட்டியலில் முறைகேடு நடந்ததாகப் புகார் எழுந்த நிலையில், வாக்காளர் பதிவு அலுவலர்கள் (ஈஆர்ஓ) இருவரை இடைநீக்கம் செய்யவும், அவர்கள் மீது வழக்கு பதிவு செய்யவும் தேர்தல் ஆணையம் உத்தரவிட்டது.
மாநிலத் தலைமைத் தேர்தல் அதிகாரி (சிஇஓ) நவ்தீப் ரின்வாவுக்கு அனுப்பிய கடிதத்தில், மயங்க் கோஸ்வாமி, ஹேமந்த் சவுத்ரி ஆகிய இரு அதிகாரிகளையும் உடனடியாக இடைநீக்கம் செய்யுமாறு ஆணையம் கூறியுள்ளது. ஆணையத்தின் முன் அனுமதியின்றி இவர்களை மீண்டும் பணியில் அமர்த்தக் கூடாது என்றும் தெரிவித்துள்ளது.
இவர்கள் இருவர் மற்றும் கணினி ஆபரேட்டர் அனில் குமார் மீதான எஃப்.ஐ.ஆர்.களில், பொது ஊழியர் சட்டத்தை மீறுவது தொடர்பான பாரதிய நியாய சன்ஹிதா பிரிவு 198-ஐ சேர்க்க ஆணையம் அறிவுறுத்தியுள்ளது. வழக்குகளை நீதிமன்றத்தில் தீவிரமாகப் பின்தொடருமாறும் கூறியுள்ளது. பிலிபித் தொகுதியின் வாக்காளர் பட்டியல் ஆய்வு குறித்த அறிக்கையை ஒரு வாரத்துக்குள் சமர்ப்பிக்க ஆணையம் உத்தரவிட்டுள்ளது.
மாநிலத்தில் உள்ள அனைத்து மாவட்ட தேர்தல் அதிகாரிகள், வாக்காளர் பதிவு அலுவலர்கள் தங்கள் வரம்புக்குட்பட்ட வாக்காளர் பட்டியலை முழுமையாக மறுஆய்வு செய்யவும் அறிவுறுத்தியுள்ளது.
