மத்திய நிதியமைச்சர் நிர்மலா சீதாராமன் நேற்று ஒப்பீட்டளவில் ஒரு குறுகிய உரையில் 2026-27 நிதியாண்டுக்கான பட்ஜெட்டை தாக்கல் செய்தார்.
அவரது பட்ஜெட் உரை சுமார் 85 நிமிடங்கள் அல்லது 1 மணி நேரம் 25 நிமிடங்கள் நீடித்தது. இது பாஜக தலைமையிலான என்டிஏ அரசின் மூன்றாவது பதவிக் காலத்தில் தாக்கல் செய்யப்படும் மூன்றாவது பட்ஜெட் மற்றும் நிர்மலாவின் தொடர்ச்சியான 9-வது பட்ஜெட் ஆகும். இந்திய நாடாளுமன்ற வரலாற்றில் மிக நீண்ட பட்ஜெட் உரையை நிகழ்த்தியவர் என்ற சாதனையை அவர் ஏற்கெனவே படைத்துள்ளார்.
2020 மத்திய பட்ஜெட் தாக்கலின்போது, அவரது உரை 2 மணி நேரம் 42 நிமிடங்கள் நீடித்தது. 2019-ல் நிர்மலாவின் முதல் பட்ஜெட் உரை 2 மணி நேரம் 17 நிமிடங்கள் நீடித்தது. அதுவே அவரது இரண்டாவது மிக நீண்ட பட்ஜெட் உரையாகும். எனவே 2026 பட்ஜெட் உரை ஒப்பீட்டளவில் குறுகியதாக இருந்தது.
வார்த்தைகள் எண்ணிக்கை அடிப்படையில் இந்திய வரலாற்றில் மிக நீண்ட பட்ஜெட் உரையை, 1991-ல் அப்போதைய நிதியமைச்சர் மன்மோகன் சிங் வழங்கினார். அந்த உரை 18,700 வார்த்தைகளை கொண்டிருந்தது.
