புதுடெல்லி: மேற்கு வங்கத்தில் உள்ளூர் இளைஞர்களை கொண்டும் பல்வேறு விளையாட்டுகள் தொடர்பாகவும் கிளப்புகள் எனப்படும் மன்றங்கள் செயல்பட்டு வருகின்றன. மேலும் காளி மற்றும் துர்கா பூஜை குழுக்களும் செயல்படுகின்றன.
இவை, அரசியல் கட்சிகளின் பேரணிகள் அல்லது பிரச்சார மேடைகளை விட மிகவும் வலிமையானதாக கருதப்படுகின்றன. இவற்றின் உறுப்பினர்கள் தேர்தல் பிரச்சாரங்களில் முக்கிய பங்கு வகிக்கின்றனர். வாக்கு சேகரித்தல், வாக்காளர்களை வாக்குச் சாவடிகளுக்கு அழைத்துச் செல்லுதல் என தேர்தல் களப்பணியாற்றுகின்றனர். ஒவ்வொரு தெருவுக்கும் அதன் சொந்த மன்றங்கள் உள்ளன. ஒவ்வொரு மன்றத்துக்கும் அதன் சொந்த செல்வாக்கு உள்ளது. இதனால், அவை மேற்கு வங்கத்தில் ஒரு ஆற்றல்மிக்க சமூக அரசியல் கட்டமைப்பாக உயர்ந்துள்ளன. இதன் காரணமாக, பெங்காலி வாக்காளர்கள் பெரும்பாலும் தங்கள் கட்சியை விட, தங்கள் பகுதி மன்றங்களின் சொல்லைத் தட்டுவதில்லை.
எனவே ஆளும் திரிணமூல் காங்கிரஸ், பாஜக போன்ற முக்கிய கட்சிகள் இந்த மன்றங்களை தங்கள் வெற்றிக்கு வேராகக் கருதுகின்றன. வங்காளத்தில் சுமார் 45,000 பதிவு செய்யப்பட்ட துர்கா பூஜை கமிட்டிகள் உள்ளன. இவை தவிர பதிவு செய்யப்படாத ஆயிரக்கணக்கான குழுக்களும் செயல்படுகின்றன. கொல்கத்தா நகரில் மட்டும், சுமார் 3,000 பூஜை குழுக்கள் உள்ளன. பெரும்பாலான பூஜை குழுக்கள் ஏதேனும் ஒரு மன்றத்துடன் இணைக்கப்பட்டுள்ளன.
துர்கா பூஜைக்கு ரூ.1.1 லட்சம்: கடந்த 2011-ல் மம்தா பானர்ஜி முதன்முறையாக ஆட்சிக்கு வந்ததில் இருந்து அவரது அரசு, அனைத்து மன்றங்கள் மற்றும் குழுக்களுடன் நெருக்கமான தொடர்பில் உள்ளது. பல்வேறு வகை நிதியுதவிகளை வசதிகளையும் மம்தா அரசு வழங்கி வருகிறது. துர்கா பூஜை குழுக்களுக்கு மாநில அரசு வழங்கும் வருடாந்திர மானியம், கடந்த சில ஆண்டுகளாக கணிசமாக அதிகரிக்கப்பட்டு விட்டது. தொடக்கத்தில் ஒரு துர்கா பூஜை குழுவுக்கு ரூ.25,000 என வழங்கப்பட்ட வருடாந்திர மானியம், கடந்த ஆண்டில் ரூ.1.10 லட்சமாக உயர்ந்தது.
இது தவிர, மின்சாரக் கட்டணத்தில் தள்ளுபடியும், பல்வேறு அனுமதிகளுக்கான கட்டணச் சலுகைகளும் தரப்படுகிறது. இது நிகழ்ச்சி ஏற்பாட்டாளர்களின் செலவுகளைக் குறைக்க உதவுகிறது. எதிர்க்கட்சியான பாஜக, தனது வாக்கு வங்கியை வலுப்படுத்தும் உத்தியாகக் கருதி, இந்த மானியங்களை அடிக்கடி விமர்சித்து வருகிறது. எனவே, இந்தமுறை மன்றங்கள் மற்றும் குழுக்களின் பலன் திரிணமூல் காங்கிரஸுக்கு கிடைக்கும் வாய்ப்புகள் தெரிகிறது.
