குவாஹாட்டி: அசாம் முதல்வர் ஹிமந்த பிஸ்வ சர்மா தனது ‘எக்ஸ்’ பக்கத்தில் வெளியிட்ட பதிவில் குறிப்பிட்டுள்ளதாவது: சில்சார் நகரில் இன்று (நேற்று) எனது வாகன அணிவகுப்புக்கு வழிவிடுவதற்காக ஆம்புலன்ஸ் நிறுத்தப்பட்டது. இது ஏற்றுக்கொள்ள முடியாதது. இதற்காக, அந்த ஆம்புலன்ஸ் வாகனத்தில் இருந்த நோயாளி மற்றும் அவரது குடும்பத்தினரிடம் மன்னிப்பு கேட்டுக் கொள்கிறேன். அவசர சிகிச்சை தேவைப்படும் ஒருவரின் உயிரைவிட எந்த முதல்வரின் பயணத்துக்கும் ஒருபோதும் முன்னுரிமை அளிக்கக் கூடாது.
மேலும், விஐபி வாகன அணிவகுப்பு காரணமாக சாதாரண பொதுமக்களுக்கு இடையூறு ஏற்படக் கூடாது என்பது தொடர்பாக எனது உத்தரவு தெளிவாக உள்ளது. அந்த உத்தரவு நடைமுறைப்படுத்தப்படாதது மிகவும் கவலைக்குரியது. இதற்கு காரணமானவர்கள் மீது கடும் நடவடிக்கை எடுக்கவும், விசாரணை நடத்தவும், சம்பந்தப்பட்ட அதிகாரிகளிடம் கேட்டுக்கொண்டுள்ளேன்.
முதல்வரின் வாகன அணிவகுப்பு தொடர்பான உத்தரவுகள் முழுமையாகவும், எந்தவித விலக்குமின்றியும் அமல்படுத்தப்படும் என்பதற்கான தெளிவான எச்சரிக்கையாக இது இருக்கட்டும். இவ்வாறு அவர் தெரிவித்துள்ளார். இதற்கிடையே, இச்சம்பவம் தொடர்பாக, பணியில் இருந்த 4 போலீஸாரை மாநில அரசு உடனடியாக பணியிடை நீக்கம் செய்துள்ளது.
முதல் முறை அல்ல: இதற்கு முன்பு கடந்த 2022-ம் ஆண்டு ஜனவரி மாதத்தில், தனது வாகன அணிவகுப்புக்காக போக்குவரத்தை நிறுத்தியதற்காக, நாகான் மாவட்ட துணை ஆட்சியர் நிசார்க் ஹிவாரேவை முதல்வர் ஹிமந்த பிஸ்வ சர்மா பொதுவெளியில் கண்டித்தார் என்பது குறிப்பிடத்தக்கது.
