புதுடெல்லி: இந்தியாவில் ஸ்டார்லிங்க் நிறுவனத்துக்கு அனுமதி வழங்குவது நாட்டின் பாதுகாப்புக்கு அச்சுறுத்தலாக அமையும் என்று நாடாளுமன்றக் குழு தலைவரும், பாஜக எம்.பி.யுமான நிஷிகாந்த் துபே எச்சரித்துள்ளார்.
ஸ்பேஸ் எக்ஸ் நிறுவனத்தின் தலைவரான எலான் மஸ்க் வெளியிட்ட பதிவில், “ஸ்டார்லிங்கால் ஜியோ நிறுவனத்தின் குறைந்த விலைகளுடன் போட்டியிட முடியாது என்கிறார்கள்; மறுபுறம் ஸ்டார்லிங்க் கடுமையான போட்டியைக் கொடுக்கும் என்றும் அஞ்சுகிறார்கள். வெளிப்படையான போட்டி நிலவுவது இந்தியக் குடிமக்களுக்கு நன்மை பயக்கும்.
விலையை சந்தை நிலவரமே தீர்மானிக்குமே தவிர, நாங்கள் அதற்கேற்ப மாற்றிக்கொள்வோம். அன்புள்ள பிரதமர் அம்பானி அவர்களே, நீங்கள்தான் இந்தியாவின் உண்மையான பாஸ் என்பதை உணராததற்கு என் மன்னிப்பைக் கோருகிறேன்” என கிண்டலாகப் பதிவிட்டிருந்தார்.
மஸ்க்கின் இந்தப் பதிவுகளுக்குக் கண்டனம் தெரிவித்து பாஜக எம்.பி. நிஷிகாந்த் துபே கூறியதாவது: பாதுகாப்பு விதிகளில் சமரசமில்லை. இந்தியா ஒரு ஆரோக்கியமான, இறையாண்மை கொண்ட ஜனநாயகம். சமூகவலைதள அழுத்தங்களுக்குப் பணிந்து அது தனது பாதுகாப்புக் கொள்கையை மாற்றிக்கொள்ளாது.
நாடாளுமன்றக் குழுவின் தலைவராக நாங்கள் நடத்திய ஆய்வுகளில், ஸ்டார்லிங்க் போன்ற வெளிநாட்டு செயற்கைக்கோள் நிறுவனங்களால் நாட்டின் பாதுகாப்பு முகமைகள், உள்துறை மற்றும் பாதுகாப்பு அமைச்சகங்கள் எதிர்கொள்ளும் ஆபத்துகள் கண்டறியப்பட்டுள்ளன. அமெரிக்கா போன்ற நாடுகளில் ஏழைகளுக்குக் குறைந்த விலையில் இணையவசதியை எலான் மஸ்க் முதலில் வழங்க வேண்டும். இந்தியாவை சமூக வலைதளங்கள் மூலம் அவர் வளைக்க முடியாது. இவ்வாறு அவர் கூறினார்.
