புதுடெல்லி: உத்தரப் பிரதேசம் மாநிலம் வாராணசியில் திருமணங்களை விட அதிகமான விவாகரத்துகள் செய்யப்படும் நிலை உருவாகி வருகிறது. இங்கு ஓர் ஆண்டில் 1500 திருமணங்கள் நடந்துள்ள நிலையில், நீதிமன்றத்தில் 2,250 விவாகரத்து வழக்குகள் பதிவாகி உள்ளது தெரியவந்துள்ளது.
இந்த வழக்குகளில் பெரும்பாலானவை திருமணமான மூன்று ஆண்டுகளுக்குள் நிகழ்கின்றன. மேலும், 15 ஆண்டுகள் ஒன்றாக வாழ்ந்த பிறகும், பல தம்பதிகள் பிரிந்து செல்வதற்காக மனுக்களைத் தாக்கல் செய்கின்றனர். இதன் பொருள், திருமண உறவுகளின் கணிதம் தலைகீழாக மாறியுள்ளது. குறைவான திருமணங்களும் அதைவிட அதிகமானப் பிரிவுகளும் ஏற்படுகின்றன.
வாராணசியின் குடும்ப நீதிமன்றத்தில் சராசரியாக, தினமும் 188 விண்ணப்பங்களும், ஆறு வழக்குகளும் ஒருவருக்கொருவர் பிரிந்து செல்வதற்காக நீதிமன்றத்தை அடைகின்றன. கடந்த ஒரு வருடத்தில் 833 வழக்குகளிலும் விவாகரத்துக்கான உத்தரவுகள் பிறப்பிக்கப்பட்டுள்ளன.
இது குறித்து வாராணசி குடும்ப நீதிமன்ற மூத்த வழக்கறிஞரான பரத் சிங் கூறுகையில், ‘திருமணமான முதல் மூன்று ஆண்டுகள் மிகவும் முக்கியமாக உள்ளன. இந்தக் காலகட்டத்தில்தான் அதிக எண்ணிக்கையிலான விவாகரத்து வழக்குகள் நிகழ்கின்றன.
பல சந்தர்ப்பங்களில், திருமணமான சில மாதங்களுக்குள் தகராறுகள் நீதிமன்றத்திற்கு வருகின்றன. திருமணமான 15 ஆண்டுகளுக்குப் பிறகும் பல தம்பதிகள் பிரிவதற்கு விண்ணப்பிப்பதும் ஆச்சரியமாக இருக்கிறது’ எனத் தெரிவித்தார் .
வாராணசியின் குடும்ப நீதிமன்றத்தில் கணவன் - மனைவி இடையேயான விவாகரத்து வழக்குகளில் பெரும்பாலானவை திருமணமான மூன்று ஆண்டுகளுக்குள் உள்ளன. இந்த வழக்குகளில் பெரும்பாலும் 25 முதல் 30 வயதுக்குட்பட்ட பெண்கள் மற்றும் ஆண்கள் சம்பந்தப்பட்டுள்ளனர்.
இந்தப் போக்குக்கு பின்னால் ஐந்து முக்கிய காரணங்கள் இருப்பதாக கருதப்படுகிறது. பெரும்பாலான வழக்குகளில் மறைக்கப்பட்ட திருமணங்கள், ஒருவரின் வேலை அல்லது குடும்ப நிலை பற்றிய துல்லியமான தகவல்களை வழங்கத் தவறியது உள்ளது. முந்தைய காதல் விவகாரங்கள், திருமணத்திற்குப் பிறகு கடந்த கால உறவுகளை வெளிப்படுத்துதல் மற்றும் அடுத்தடுத்த தகராறுகள் ஆகியவையும் இடம்பெறுகின்றன.
ஆண்கள் மீது வரதட்சிணை துன்புறுத்தல் உள்ளிட்ட வழக்குகள், திருமணத்திற்குப் புறம்பான விவகாரங்கள் மற்றும் போதைப்பொருள் அடிமைத்தனம் போன்ற குற்றச்சாட்டுகள் எழுகின்றன.
சில வழக்குகளில் ஆண்மைக் குறைவு அடங்கும். குடும்ப நீதிமன்றம் ஆரம்பத்தில் ஆலோசனையைப் பயன்படுத்துகிறது. பல சந்தர்ப்பங்களில் சமரசம் அடையப்பட்டாலும், கணிசமான எண்ணிக்கையிலான தம்பதிகள் சமரசத்தை எட்ட முடியாத நிலை தொடர்கிறது.
