திருப்பதி ஏழுமலையான் கோயில் ரூ.300 சிறப்பு தரிசன டிக்கெட்: பிப். 24-ல் ஆன்லைனில் வெளியீடு

திருமலை: திருப்பதி ஏழுமலையானை வரும் மே மாதத்தில் தரிசனம் செய்வதற்கு ஆன்லைன் டிக்கெட்டுகளை திருமலை திருப்பதி தேவஸ்தானம் வெளியிட உள்ளது.

இதன்படி மூத்த குடிமக்கள், மாற்றுத்திறனாளி பக்தர்கள் வரும் 23-ம் தேதி மதியம் 3 மணிக்கு தங்களுக்கான டிக்கெட்டுகளை முன்பதிவு செய்து கொள்ளலாம். ஸ்ரீவாணி அறக்கட்டளை மூலம் தரிசிக்க விரும்புவோர் 23-ம் தேதி காலை 11 மணிக்கு முன்பதிவு செய்துகொள்ளலாம்.

ரூ.300 சிறப்பு தரிசன டிக்கெட்டுகள் முன்பதிவு வரும் 24-ம் தேதி காலை 10 மணிக்கு தொடங்குகிறது. அதே நாள் மதியம் 3 மணிக்கு திருமலையில் தங்கும் அறைகளுக்கான முன்பதிவு தொடங்க உள்ளது.

எலக்ட்ரானிக் இயந்திரம் மூலம் குலுக்கல் முறையில் வழங்கப்படும் டிக்கெட்டுகளுக்கு 19-ம் தேதி காலை 10 மணி முதல் 21-ம் தேதி காலை 10 மணி வரை பதிவு செய்துகொள்ளலாம். திருக்கல்யாண உற்சவம், ஊஞ்சல் சேவை, ஆர்ஜித பிரம்மோற்சவம் மற்றும் சகஸ்ர தீப அலங்கார சேவை போன்ற சேவைகளுக்கு 22-ம் தேதி காலை 10 மணிக்கு முன்பதிவு செய்து கொள்ளலாம். அங்கப்பிரதட்சணம் செய்ய விரும்பும் பக்தர்கள் வரும் 23-ம் தேதி காலை 10 மணிக்கு இலவசமாக முன்பதிவு செய்துகொள்ளலாம்.