சென்னை: கொளத்தூர் சோமநாத சுவாமி கோயில் வளாகத்தில் உள்ள சூரியக்குளத்தைத் தூய்மைப்படுத்தும் பணியை ‘வீ த லீடர்ஸ்’ அமைப்பினர் மேற்கொண்டனர்.
பாஜக முன்னாள் மாநிலத் தலைவர் கே.அண்ணாமலையால் தொடங்கப்பட்ட ‘வீ த லீடர்ஸ்’ அமைப்பின் முக்கிய நோக்கங்களில் தூய்மைப் பிரச்சாரமும் ஒன்றாகும்.
அதாவது, தமிழகத்தின் அனைத்து தொகுதிகளிலும் உள்ள பொது இடங்களைத் தூய்மைப்படுத்தி, பிளாஸ்டிக் பயன்பாட்டைக் குறைத்து, நிலையான சுற்றுச்சூழல் கொண்ட தமிழகத்தை உருவாக்குவது முக்கிய இலக்காகும்.
இந்நிலையில், கொளத்தூர் சோமநாத சுவாமி கோயில் வளாகத்தில் உள்ள சூரியக்குளத்தை தூய்மைப்படுத்தும் பணியை ‘வீ த லீடர்ஸ்’ அமைப்பினர் நேற்று முன்தினம் மேற்கொண்டனர். கொளத்தூர் மற்றும் சுற்றுவட்டாரப் பகுதிகளில் உள்ள நீர்நிலைகளைத் தொடர்ந்து தூய்மைப்படுத்தி பாதுகாக்கும் பணிகளை மேற்கொள்ள உள்ளதாக அமைப்பினர் தெரிவித்தனர்.
நிகழ்ச்சியில் ‘வீ த லீடர்ஸ்’ அமைப்பின் பொதுச்செயலாளர் கரு.நாகராஜன் பங்கேற்று பணிகளை பார்வையிட்டார். நிகழ்ச்சி ஏற்பாட்டாளர்களாக பூபேஷ் பி. மற்றும் ஹேமமாலினி செயல்பட்டனர்.
இந்நிகழ்வில் 20-க்கும் மேற்பட்ட நிர்வாகிகள் மற்றும் 30-க்கும் மேற்பட்ட பொதுமக்கள் கலந்து கொண்டு தூய்மைப் பணியில் ஈடுபட்டனர். தொடர்ந்து நீர்நிலைகள் பாதுகாப்பு தொடர்பாக சம்பந்தப்பட்ட துறையினரிடம் மனு அளிக்கவும் திட்டமிட்டுள்ளதாக அமைப்பினர் தெரிவித்தனர்.
