குரோம்பேட்டை: குரோம்பேட்டை பாரதிபுரம் பகுதியில் 60 ஆண்டுகள் பழமையான அரசமரம் திடீரென சாய்ந்ததற்கான காரணத்தை கண்டறிய வலியுறுத்தி, பசுமைத் தாயகம், மக்களுக்கான மக்கள் இயக்கம் சார்பில் பெண்கள் ஒப்பாரி வைத்து போராட்டத்தில் ஈடுபட்டனர்.
குரோம்பேட்டை பாரதிபுரத்தில் உள்ள முத்துமாரியம்மன் கோயில் அருகே சுமார் 60 ஆண்டுகளாக பழமையான அரசமரம் இருந்து வந்தது. அப்பகுதி மக்களுக்கு நிழல், பாதுகாப்பு அளித்து வந்த இந்த மரம், நேற்று முன்தினம் மழை, பலத்த காற்று போன்ற எந்த இயற்கை காரணங்களும் இல்லாத நிலையில் திடீரென சாய்ந்து விழுந்தது. இதனால் அதிர்ச்சியடைந்த அப்பகுதி மக்கள், மரம் சாய்ந்ததற்கான காரணம் குறித்து சந்தேகம் எழுப்பியுள்ளனர். மரம் இடையூறாக இருப்பதாகக் கருதி, அதன் வேர்களில் ரசாயனப் பொருள் ஊற்றப்பட்டிருக்கலாம் என்ற சந்தேகமும் சிலரால் தெரிவிக்கப்பட்டது. எனினும் இதுகுறித்து அதிகாரப்பூர்வமாக எந்த காரணமும் உறுதி செய்யப்படவில்லை.
உண்மை கண்டறிய கோரிக்கை: மரம் சாய்ந்த சம்பவம் தொடர்பாக உரிய விசாரணை நடத்தி, மரத்தின் வேர்கள் மற்றும் சுற்றுப்புறப் பகுதிகளை அறிவியல் ரீதியாக ஆய்வு செய்து உண்மையான காரணத்தைக் கண்டறிய வேண்டும் என பொதுமக்கள், சமூக ஆர்வலர்கள் வலியுறுத்தினர்.
இந்நிலையில் பசுமைத் தாயகம் மற்றும் மக்களுக்கான மக்கள் இயக்கம் சார்பில் சாய்ந்த அரசமரத்துக்கு அஞ்சலி செலுத்தும் நிகழ்ச்சி நடைபெற்றது. இதில் பங்கேற்றவர்கள் மரத்துக்கு பால் ஊற்றி, மஞ்சள், குங்குமம் வைத்து, மலர் தூவி அஞ்சலி செலுத்தினர். தொடர்ந்து பெண்கள் ஒப்பாரி வைத்து அழுவதுபோல் போராட்டத்தில் ஈடுபட்டனர்.
நிகழ்ச்சியில் பசுமைத் தாயகம் மாநில துணைச் செயலாளர் ஐ.நா.கண்ணன், மக்களுக்கான மக்கள் இயக்கம் செயலாளர் கார்த்திக் கண்ணன், மீனாட்சி சுந்தரம், நரேந்திரன், பசுமைத் தாயகம் நிர்வாகிகள் வளர்மதி குப்பன், வேதகிரி, சசிகுமார், மணிகண்டன் உள்ளிட்டோர் கலந்து கொண்டனர். மேலும் சமூக ஆர்வலர்கள் மற்றும் குடியிருப்போர் நலச் சங்க நிர்வாகிகளும் பங்கேற்றனர்.
பழமையான மரங்களைப் பாதுகாக்க உரிய நடவடிக்கை எடுக்க வேண்டும் என்றும், இந்த மரம் சாய்ந்ததற்கான காரணத்தை முழுமையாக விசாரித்து உண்மையை வெளிக்கொண்டு வர வேண்டும் என்றும் நிகழ்ச்சியில் வலியுறுத்தப்பட்டது.
