சென்னை: சித்தா, ஆயுர்வேதம், யுனானி, ஓமியோபதி படிப்புகளில் காலியாகவுள்ள 1,030 இடங்களுக்கு ஆன்லைனில் விண்ணப்பிக்க இன்று கடைசி நாளாகும்.
தமிழகத்தில் உள்ள அரசு மற்றும் தனியார் கல்லூரிகளில் உள்ள சித்தா, ஆயுர்வேதம், யுனானி, ஓமியோபதி (பிஎஸ்எம்எஸ், பிஏஎம்எஸ், பியுஎம்எஸ், பிஎச்எம்எஸ்) படிப்புகளுக்கு 2026-27-ம் கல்வி ஆண்டு மாணவர் சேர்க்கை கலந்தாய்வு 3 கட்டங்களாக நடைபெற்றது.
இந்நிலையில், மூன்று கட்ட கலந்தாய்வு முடிவில் 540 அரசு ஒதுக்கீட்டு இடங்கள், 160 அகில இந்திய ஒதுக்கீட்டு இடங்கள், 330 நிர்வாக இடங்களும் காலியாக உள்ளன. நீட் தேர்வு மதிப்பெண் அடிப்படையில் நிரப்பப்படும் அந்த இடங்களில் சேர விரும்புவோர் www.tnayushselection.org என்ற இணையதளம் மூலம் இன்று மாலை 5 மணிக்குள் விண்ணப்பிக்க வேண்டும்.
அதில் அரசு இடங்கள், அகில இந்திய இடங்கள், நிர்வாக இடங்களுக்கு தனித்தனியே விண்ணப்பிக்க வேண்டும் என இந்திய மருத்துவம் மற்றும் ஓமியோபதி துறை கூறியுள்ளது.
