சென்னை: எம்பிஏ, எம்சிஏ மாணவர் சேர்க்கைக்கான டான்செட் பொது நுழைவுத் தேர்வுக்கான ஹால்டிக்கெட் இணையதளத்தில் நாளை (சனிக்கிழமை) பதிவேற்றம் செய்யப்படும் என அண்ணா பல்கலைக்கழகம் அறிவித்துள்ளது.
இது தொடர்பாக அண்ணா பல்கலைக்கழகத்தின் டான்செட் நுழைவுத்தேர்வு செயலாளர் பேராசிரியர் ஆர்.ஸ்ரீதரன் வெளியிட்ட செய்திக் குறிப்பு: தமிழக அரசு சார்பில் எம்பிஏ, எம்சிஏ சேர்க்கைக்கான டான்செட் பொது நுழைவுத் தேர்வையும், எம்இ, எம்டெக், எம்ஆர்க், எம்.பிளான் சேர்க்கைக்கான பொது பொறியியல் நுழைவுத்தேர்வையும் (சீட்டா) அண்ணா பல்கலைக்கழகம் நடத்த உள்ளது.
டான்செட் எம்சிஏ நுழைவுத் தேர்வு மார்ச் 22-ம் தேதி காலையில் நடைபெற உள்ளது. இத்தேர்வுக்கு 10,287 பேர் விண்ணப்பித்துள்ளனர். டான்செட் எம்பிஏ நுழைவுத்தேர்வு மார்ச் 22-ம் தேதி பிற்பகல் நடைபெறுகிறது. இத்தேர்வெழுத 22,806 பேர் விண்ணப்பித்துள்ளனர். சீட்டா நுழைவுத்தேர்வு மார்ச் 23-ம் தேதி காலை நடக்கிறது. இத்தேர்வுக்கு 5,208 பேர் விண்ணப்பித்து இருக்கிறார்கள்.
மேற்கண்ட நுழைவுத்தேர்வுகளுக்கு விண்ணப்பித்துள்ள மாணவர்களுக்கு ஹால்டிக்கெட் சனிக்கிழமை (நாளை) இணையதளத்தில் (www.tancet.annauniv.edu/tancet) பதிவேற்றம் செய்யப்படும். மூன்று நுழைவுத் தேர்வுகளும் சேர்த்து மொத்தம் 38,301 பேர் விண்ணப்பித்துள்ளனர். அவர்களுக்காக தமிழகம் முழுவதும் 16 நகரங்களில் 42 தேர்வு மையங்கள் அமைக்கப்பட்டுள்ளன. இவ்வாறு அவர் கூறியுள்ளார்.