நிஷாந்த்
பூந்தமல்லி: மாங்காட்டில் போதை மறுவாழ்வு மையத்தில் சிகிச்சை பெற்று வந்த இளைஞர், ஊழியர்களால் கொலை செய்யப்பட்ட சம்பவம் பரபரப்பை ஏற்படுத்தியுள்ளது.
காஞ்சிபுரம் மாவட்டம், மாங்காடு, சங்கரா நகர் பகுதியில் செயல்பட்டு வரும் தனியார் போதை மறுவாழ்வு மையத்தில் போதைப் பழக்கத்துக்கு அடிமையான 100-க்கும் மேற்பட்டோர் தங்கி சிகிச்சை பெற்று வருகின்றனர்.
சென்னை, திருவொற்றியூரைச் சேர்ந்த நிஷாந்த் (23) என்ற இளைஞரும் கடந்த 6 மாதங்களாகத் தங்கி சிகிச்சை பெற்று வந்தார்.
இந்த மையத்தில் கோயம்புத்தூரைச் சேர்ந்த பாபு (55), ஆவடி கன்னடபாளையத்தைச் சேர்ந்த சிவகுமார் (57) ஆகியோர் சிகிச்சை பெற்று திருந்தி, இங்கேயே பணி செய்து வந்தனர்.
இந்நிலையில் பாபு, சிவகுமார் குறித்தும், அவர்களின் குடும்பங்கள் குறித்தும் நிஷாந்த் அடிக்கடி தவறாக பேசி வந்ததாக கூறப்படுகிறது.
நிஷாந்த் நேற்று முன்தினம் இரவும் பாபு, சிவகுமாரிடம் தகராறில் ஈடுபட்டு, அவர்கள் குறித்து தவறாக பேசியதாகக் கூறப்படுகிறது. இதனால் ஆத்திரமடைந்த இருவரும் கத்தியால் குத்தியதில் நிஷாந்த் சம்பவ இடத்திலேயே உயிரிழந்தார்.
தகவலறிந்த மாங்காடு போலீஸார் நிஷாந்தின் உடலை மீட்டு, பிரேதப் பரிசோதனைக்காக அரசு மருத்துவமனைக்கு அனுப்பி வைத்தனர். தொடர்ந்து வழக்குப் பதிவு செய்து பாபு, சிவகுமார் ஆகியோரை கைது செய்தனர்.
