நாகப்பட்டினம்: நாகை அருகே 137 கிலோ மெத்தம்பெட்டமைன் போதைப்பொருள் பறிமுதல் செய்யப்பட்ட வழக்கு எதிரொலியாக 2 போலீஸார் பணியிடமாற்றம் செய்யப்பட்டுள்ளனர். மேலும் ஒருவருக்கு மத்திய வருவாய் புலனாய்வு இயக்குநரக அதிகாரிகள் சம்மன் அனுப்பி உள்ளனர்.
நாகை மாவட்டம் வேளாங்கண்ணி அருகே பிரதாபராமபுரத்தில் 137 கிலோ மெத்தம்பெட்டமைன் போதைப்பொருள் பறிமுதல் செய்யப்பட்ட வழக்கில் சிந்தாமணி கிராமத்தைச் சேர்ந்த தவெக நிர்வாகியாக இருந்த பூபாலன், அவரது நண்பர்கள் சுகன், சதீஷ், மணிகண்டன் ஆகிய 4 பேரை மத்திய வருவாய் புலனாய்வு இயக்குநரக அதிகாரிகள் கைது செய்து விசாரணை நடத்தி வருகின்றனர்.
இந்த கடத்தல் சம்பவத்தில் மேலும் சிலருக்குத் தொடர்பு இருக்கலாம் என்ற கோணத்தில் அதிகாரிகள் விசாரணையை தீவிரப்படுத்தியுள்ளனர். இதுதொடர்பாக, நாகை மாவட்டம் பிரதாபராமபுரம் நடுத்தெருவைச் சேர்ந்த சுகனின் கூட்டாளியான ராஜ்குமாருக்கு சம்மன் அனுப்பப்பட்டுள்ளது. மேலும், மெத்தம்பெட்டமைன் போதைப்பொருளை கடத்துவதற்கு பயன்படுத்தப்பட்டதாகக் கூறப்படும் கார் ராஜ்குமாருக்குச் சொந்தமானது எனவும் தகவல் வெளியாகியுள்ளது.
அவர் வேளாங்கண்ணி பகுதியில் 2 தங்கும் விடுதிகளை நடத்தி வருவதுடன், பைனான்ஸ் தொழிலிலும் ஈடுபட்டு வருவதாகக் கூறப்படுகிறது.
வேளாங்கண்ணி காவல் துணை கண்காணிப்பாளரின் ஓட்டுநர் சிவா, வேளாங்கண்ணி காவல் நிலைய பெண் காவலர் சங்கீதா ஆகியோர் நேற்று திடீரென தஞ்சாவூருக்கு பணியிட மாற்றம் செய்யப்பட்டுள்ளனர்.
இதில், சிவா, போதைப்பொருள் கடத்தல் வழக்கில் கைது செய்யப்பட்ட பிரதாபராமபுரம் பகுதியைச் சேர்ந்த சுகனின் உறவினர் என்பதும், வேளாங்கண்ணியில் சுகன் நடத்தி வரும் தங்கும் விடுதியில் கைப்பற்றப்பட்ட டைரியில் சிவா, சங்கீதா ஆகியோரது பெயர் இருந்தததாகவும் கூறப்படுகிறது. ஆனால், இவர்கள் பணியிட மாற்றத்துக்கான காரணம் எதுவும் வெளிப்படையாகத் தெரிவிக்கப்படவில்லை.
