சென்னை: சென்னை கொளத்தூரைச் சேர்ந்த 26 வயது பெண் ஒருவர், வீட்டிலிருந்து பணிபுரியும் வேலை தேடி வந்தார்.
கடந்த மே 20-ம் தேதி ராயப்பேட்டையில் உள்ள வணிக வளாகத்துக்குச் சென்றபோது, தனியார் நிறுவனத்தின் மனிதவளப் பிரிவு அதிகாரி என அறிமுகப்படுத்திக் கொண்ட பெண் ஒருவர், பின்னர் அவரைத் தொலைபேசியில் தொடர்புகொண்டு தங்கள் நிறுவனத்தில் வேலை இருப்பதாகக் கூறியுள்ளார். மேலும், வீட்டிலிருந்து வேலை செய்வதற்காக லேப்- டாப்பில் மென்பொருள் நிறுவ ரூ.4,500 முன்பணம் செலுத்த வேண்டும் எனத் தெரிவித்துள்ளார்.
இதனை நம்பிய அந்தப் பெண், ஜி-பே மூலம் ரூ.4,500 செலுத்தியுள்ளார். ஆனால், பணத்தைப் பெற்ற பிறகு வேலை குறித்த எந்தத் தகவலும் தெரிவிக்கப்படவில்லை. இதுகுறித்து அண்ணா சாலை காவல் நிலையத்தில் புகார் அளிக்கப்பட்டது. இதன் பேரில் மோசடி மற்றும் தகவல் தொழில்நுட்பச் சட்டப்பிரிவுகளின் கீழ் போலீஸார் வழக்குப்பதிவு செய்து விசாரணை நடத்தினர். இதையடுத்து, மோசடிக்கு மூளையாக செயல்பட்ட ஆரோனை போலீஸார் கைது செய்தனர்.
அவர் கொடுத்த தகவலின்பேரில் அவரது கூட்டாளிகளான மாதவரத்தைச் சேர்ந்த கோகுல்நாத் (26), கொடுங்கையூரைச் சேர்ந்த அஜ்மல் பாஷா (32) ஆகிய மேலும் இருவரை போலீஸார் கைது செய்தனர். மேலும் பலரை தேடி வருகின்றனர். விசாரணையில், கைது செய்யப்பட்ட 3 பேரும் குழுவாகச் செயல்பட்டு, சுமார் 500 பேரிடம் ரூ.25 லட்சம் வரை மோசடி செய்துள்ளதாக தெரிய வந்துள்ளது.
