கோப்புப் படம்
சென்னை: சென்னைக்கு வந்த இண்டிகோ விமானத்தின் கழிவறையில் வெடிகுண்டு மிரட்டல் வாசகம் ஒட்டப்பட்டிருந்ததால், விமானம் அவசரமாக தரையிறக்கப்பட்டது. இதனால் சென்னை விமான நிலையத்தில் பதற்றம் ஏற்பட்டது.
ஐதராபாத்தில் இருந்து 192 பயணிகள் மற்றும் 6 விமான ஊழியர்கள் என மொத்தம் 198 பேருடன் இண்டிகோ நிறுவனத்தின் பயணிகள் விமானம் நேற்று மதியம் 12 மணியளவில் சென்னைக்கு புறப்பட்டது.
இந்நிலையில் விமானம் நடுவானில் 32 ஆயிரம் அடி உயரத்தில் பறந்து கொண்டிருந்த போது, கழிவறை கண்ணாடியில் ‘BOOM - 1.50 PM’ என எழுதப்பட்ட டிஷ்யூ பேப்பர் ஒன்று ஒட்டப்பட்டிருந்ததை விமான ஊழியர் ஒருவர் பார்த்தார்.
இதை கண்டு அதிர்ச்சியடைந்த அவர் உடனடியாக விமானிக்குத் தகவல் தெரிவித்தார். இது வெடிகுண்டு மிரட்டலாக இருக்கலாம் என கருதிய விமானி, சென்னை விமான நிலையக் கட்டுப்பாட்டு அறைக்கு அவசர தகவல் கொடுத்தார்.
இதையடுத்து சென்னை விமான நிலையத்தில் பாதுகாப்பு ஏற்பாடுகள் துரிதப்படுத்தப்பட்டன. மதியம் 12.58 மணியளவில் தரையிறங்கிய அந்த விமானம், வழக்கமான இடத்துக்குக் கொண்டு செல்லப்படாமல் ரிமோட்-பே பகுதிக்கு மாற்றப்பட்டது.
அங்கு தயார் நிலையில் இருந்த விமான நிலைய பாதுகாப்பு அதிகாரிகள், வெடிகுண்டு நிபுணர்கள் மற்றும் அதிரடிப் படை வீரர்கள் விமானத்தைச் சுற்றி வளைத்து, பயணிகள் அனைவரையும் அவசரமாக கீழே இறக்கினர்.
தொடர்ந்து வெடிகுண்டு நிபுணர்கள் மோப்ப நாய்களின் உதவியுடன் விமானம் முழுவதும் தீவிர சோதனை நடத்தினர். பயணிகள் மற்றும் அவர்களின் உடைமைகளும் முழுமையாக பரிசோதிக்கப்பட்டன.
மிரட்டல் கடிதத்தில் குறிப்பிட்டிருந்த 1.50 மணியையும் கடந்து, பிற்பகல் 2.30 மணி வரை ஒன்றரை மணி நேரத்துக்கும் மேலாக இந்த சோதனை நீடித்தது. முடிவில் சந்தேகப்படும்படியான எந்தப் பொருளும் சிக்காததால், இது போலி வெடிகுண்டு மிரட்டல் என்பது உறுதி செய்யப்பட்டது.
இந்த சம்பவம் குறித்து வழக்குப் பதிவு செய்த சென்னை விமான நிலைய போலீஸார், பயணிகள் யாரேனும் இச்செயலில் ஈடுபட்டார்களா என்ற கோணத்தில் விசாரித்து வருகின்றனர்.
