முட்டுக்காடு: யூடியூபர் வெளியிட்ட காணொலியால் மன உளைச்சலுக்கு ஆளானதாகக் கூறப்படும் பிரபல இன்ஸ்டாகிராம் நிதி ஆலோசகர் ஹரீஷ் (26) தற்கொலை செய்து கொண்ட சம்பவத்தில், யூடியூபர் ஜேசன் சாமுவேல் மீது கானத்தூர் போலீஸார் வழக்குப் பதிவு செய்து விசாரித்து வருகின்றனர்.
புதுச்சேரியைச் சேர்ந்த விநாயகத்தின் மகன் ஹரீஷ். இவர் ‘கேபிட்டல் அண்ட் டிஜிட்டல் சர்வீஸ்’ என்ற பெயரில் இணைய வழி நிதி ஆலோசனை நிறுவனம் நடத்தி வந்தார்.
மேலும் ‘ஃபைனான்ஸ் வித் ஹரீஷ்’ என்ற பெயரில் இன்ஸ்டாகிராம் பக்கத்தை நடத்தி, நிதி மேலாண்மை தொடர்பான ஆலோசனைகளை வழங்கி வந்தார். இவரை 13 லட்சத்துக்கும் அதிகமானோர் பின்தொடர்ந்து வந்தனர்.
செங்கல்பட்டு மாவட்டம், முட்டுக்காடு கடற்கரை அருகேயுள்ள செரினிட்டி வில்லாவில் ஹரீஷ் தங்கியிருந்தார். இந்நிலையில் கடந்த சில நாட்களுக்கு முன்பு யூடியூபர் ஜேசன் சாமுவேல் வெளியிட்ட காணொலியில் ஹரீஷுக்கு எதிராகப் பல்வேறு விமர்சனங்களும் குற்றச்சாட்டுகளும் இடம்பெற்றதாகக் கூறப்படுகிறது. இதனால் ஹரீஷ் மன உளைச்சலுக்கு ஆளானதாகத் தெரிகிறது.
இந்நிலையில் ஹரீஷைப் பார்க்க அவரது வீட்டுக்கு கடந்த 20-ம் தேதி நண்பர் ராகவ் சென்றார். அங்கு அறையில் ஹரீஷ் இறந்த நிலையில் இருப்பதைக் கண்டார். உடனடியாக அவரை கேளம்பாக்கத்தில் உள்ள தனியார் மருத்துவமனைக்குக் கொண்டு சென்றார். அங்கு பரிசோதித்த மருத்துவர்கள் ஹரீஷ் ஏற்கெனவே இறந்துவிட்டதாகத் தெரிவித்தனர்.
கானத்தூர் போலீஸார், உடலைக் கைப்பற்றி விசாரணை நடத்தினர். ஹரீஷின் தந்தை விநாயகம் அளித்த புகாரின் பேரில், யூடியூபர் ஜேசன் சாமுவேல் மீது தற்கொலைக்குத் தூண்டுதல் பிரிவின் கீழ் வழக்குப் பதிவு செய்யப்பட்டது. தலைமறைவாக உள்ள அவரை போலீஸார் தேடி வருகின்றனர்.
மேலும் ஹரீஷ் பதிவு செய்த காணொலியில், ஜேசன் சாமுவேல் தன்னிடம் ரூ.3 கோடி கேட்டு மிரட்டியதாகவும், பணம் தராவிட்டால் சமூக வலைதளக் கணக்குகளை முடக்குவதாகவும், பெற்றோருக்குத் தீங்கு விளைவிப்பதாக கூறியதாகவும் குற்றம்சாட்டியிருந்ததாக தெரிகிறது.
இந்தக் குற்றச்சாட்டுகளின் உண்மைத்தன்மை, சமூக வலைதளப்பதிவுகள் மற்றும் டிஜிட்டல் ஆதாரங்கள் குறித்து போலீஸார் தொடர்ந்து விசாரணை நடத்தி வருகின்றனர்.
