நிரஞ்சன் சர்மா
தாம்பரம்: மனைவிக்கு தெரியாமல் அவர் குளிக்கும்போதும், உடை மாற்றும்போதும் ரகசியமாக புகைப்படம், வீடியோ எடுத்து, செயற்கை நுண்ணறிவு தொழில்நுட்பத்தைப் பயன்படுத்தி ஆபாசப் படங்களாக மாற்றியதாகக் கணவரை போலீஸார் கைது செய்து சிறையில் அடைத்தனர்.
தாம்பரம் அருகே புதுப்பெருங்களத்தூர், எஸ்எஸ்எம் நகரைச் சேர்ந்தவர் ஐஸ்வர்யா (30). இவருக்கும் ஆதனூர், ஊரப்பாக்கத்தைச் சேர்ந்த நிரஞ்சன் சர்மா என்பவருக்கும் கடந்த 2019-ம் ஆண்டு மே 29-ம் தேதி திருமணம் நடைபெற்றது. இவர்களுக்கு குழந்தை உள்ளது.
நகைகள் அடமானம்
திருமணத்தின்போது பெற்றோர் வழங்கிய தங்க நகைகளை ஐஸ்வர்யா ஊரப்பாக்கத்தில் உள்ள வங்கி பாதுகாப்புப் பெட்டகத்தில் வைத்திருந்துள்ளார். அந்த நகைகளை கணவர் நிரஞ்சன் தனக்குத் தெரியாமல் ஒவ்வொன்றாக எடுத்து அவற்றை விற்றும், அடமானம் வைத்தும் வந்தது தெரிந்தது.
இதனால் இரு குடும்பத்தினருக்கும் இடையே தகராறு ஏற்பட்டுள்ளது. இதையடுத்து கடந்த செப்.20-ம் தேதி கணவரின் செல்போனை எடுத்துக்கொண்டு குழந்தையுடன் தனது தாய் வீட்டுக்குச் சென்றுள்ளார்.
கணவர் மிரட்டல்
கடந்த நவ.4-ம் தேதி கணவரின் செல்போனில், தனது புகைப்படங்கள் ஆபாசமாக மார்ஃபிங் செய்யப்பட்டிருந்ததைக் கண்டு அதிர்ச்சியடைந்துள்ளார்.
மேலும் தனக்கு தெரியாமல் எடுக்கப்பட்ட அந்தரங்கக் காட்சிகள், தனது தாயாருடன் தவறான உறவில் இருப்பதுபோலச் சித்தரிக்கப்பட்ட படங்கள், சமூக ஊடகங்களிலிருந்து சேகரிக்கப்பட்ட பல பெண்களின் புகைப்படங்களும் ஆபாசமாக மாற்றப்பட்டு போனில் சேமிக்கப்பட்டு இருப்பது தெரிந்தது.
விவாகரத்து செய்ய முடிவு செய்தபோது புகைப்படங்களை இணையத்தில் பதிவேற்றம் செய்வதாகக் கணவர் மிரட்டி உள்ளார்.
இது தொடர்பாக முதலில் பீர்க்கன்காரணை காவல் நிலையத்தில் புகார் அளித்த போது, போலீஸார் முறையாக விசாரிக்கவில்லை என்றும், மாறாக குற்றம்சாட்டப்பட்டவருக்கு ஆதரவாக செயல்பட்டனர் என்றும் கூறப்படுகிறது.
இதையடுத்து காவல் ஆணையர் அமல்ராஜிடம் புகார் தெரிவிக்கப்பட்டது. அவரது உத்தரவின்பேரில் போலீஸார் வழக்குப்பதிவு செய்து விசாரணை நடத்தி நிரஞ்சன் சர்மாவைக் கைது செய்து சிறையில் அடைத்தனர்.
இதற்கிடையே புகார் அளிக்க வந்த பெண்ணிடம் அநாகரிகமான முறையில் நடந்துகொண்டதாகக் கூறப்படும் சம்பந்தப்பட்ட காவல் அதிகாரி மீதும் துறை ரீதியான நடவடிக்கை எடுக்க வேண்டும் என்று பாதிக்கப்பட்ட தரப்பினர் வலியுறுத்தியுள்ளனர்.
