சென்னை: சென்னை விமான நிலையத்தில் ரூ.4 கோடி மதிப்புள்ள தங்கம் பறிமுதல் செய்யப்பட்டது. தங்கத்தை கடத்தி வந்த 2 பயணிகள், உதவியாக இருந்த 2 சுங்கத்துறை ஊழியர்கள், எக்ஸ்ரே அறையின் 2 ஊழியர்கள் கைது செய்யப்பட்டனர்.
துபாயில் இருந்து இலங்கை வழியாக லங்கன் ஏர் லைன்ஸ் பயணிகள் விமானம் சென்னைக்கு நேற்று வந்தது. அந்த விமானத்தில் வந்த பயணிகளையும், அவர்களின் உடைமைகளையும் சுங்கத்துறை அதிகாரிகள் சோதனை செய்து அனுப்பிக் கொண்டிருந்தனர்.
அப்போது இலங்கையைச் சேர்ந்த 2 பயணிகள் மீது அதிகாரிகளுக்கு சந்தேகம் ஏற்பட்டது. அவர்களை அழைத்துச் சென்று எக்ஸ்ரே எடுத்து வருமாறு 2 சுங்கத்துறை ஊழியர்களிடம் ஒப்படைத்தனர்.
அவர்கள் இருவரும் பயணிகளை எக்ஸ்ரே எடுக்காமல், பழைய ரிசல்ட்களை கொண்டு வந்து உடலில் ஒன்றும் இல்லை என்று கொடுத்தனர்.
முன்கூட்டியே கிடைத்த ரகசிய தகவலின்படி, இதை கவனித்துக் கொண்டிருந்த மத்திய வருவாய் புலனாய்வுத்துறை அதிகாரிகள், 2 பயணிகளையும் ஊழியர்களையும் அழைத்துச் சென்று எக்ஸ்ரே எடுத்து பார்த்ததில், பயணிகளின் ஆசன வாய்க்குள் தங்கக் கட்டிகளை மறைத்து வைத்திருந்தது தெரியவந்தது.
இதையடுத்து, ரூ.4 கோடி மதிப்புள்ள 2.6 கிலோ தங்கத்தை பறிமுதல் செய்த அதிகாரிகள், 2 பயணிகள், 2 சுங்கத்துறை ஊழியர்கள் மற்றும் எக்ஸ்ரே அறையின் 2 ஊழியர்கள் என 6 பேரையும் கைது செய்து விசாரணை நடத்தினர். தொடர்ந்து, 6 பேரும் நீதிமன்றத்தில் ஆஜர்படுத்தப்பட்டு சிறையில் அடைக்கப்பட்டனர்.
