திருவள்ளூர்: ஆடை வடிவமைப்பாளரிடம் ரூ.16 லட்சம், 22 பவுன் தங்க நகைகளை அவசர தேவைக்காக பெற்றுவிட்டு திருப்பித் தராமல் மோசடி செய்த கேரளாவைச் சேர்ந்த தந்தை, மகனை போலீஸார் தீவிரமாக தேடி வருகின்றனர்.
திருவள்ளூர் அருகே உள்ள மேல்நல்லத்தூர் பகுதியில் வசித்து வருபவர் ரஷிதா (54). கேரளாவை பூர்வீகமாக கொண்ட இவர் ஆடை வடிவமைப்பாளராக இருந்து வருகிறார்.
கேரளாவில் ரஷிதாவின் தந்தைக்கு உதவியாக இருந்து வந்த, மலப்புரம் மாவட்டத்தைச் சேர்ந்த சுஹேப்(48) கடந்த 2020-ம் ஆண்டு ரஷிதாவிடம் மேற்பார்வையாளராக பணிக்குச் சேர்ந்துள்ளார். சுஹேப் மட்டுமல்லாமல், அவரது மகன் அகில் நசீம்(28) என்பவரும் ரஷிதாவிடம் வாகன ஓட்டுநராக பணிபுரிந்து வந்துள்ளார்.
சிறுகச் சிறுக கடன்
இந்நிலையில், சுஹேப், வீட்டில் உள்ளவர்களுக்கு உடல்நலம் சரியில்லை, மகனை வெளிநாட்டுக்கு அனுப்ப வேண்டும் போன்ற பல்வேறு காரணங்களைச் சொல்லி, ரஷிதாவிடம் 3 ஆண்டுகளில் ரூ.16 லட்சம் வரை கடனாக வாங்கியுள்ளார்.
மேலும், ரஷிதாவிடம் 22 பவுன் தங்க நகைகளையும் அவசர தேவைக்காக சிறுகச் சிறுக வாங்கியுள்ளார். அவ்வாறு வாங்கிய பணம் மற்றும் நகையை ரஷிதா பலமுறை திரும்பக் கேட்டும் திருப்பித் தராமல் இருந்து வந்துள்ளார்.
பதிலளிக்காமல் தவிர்ப்பு
இந்நிலையில் கடந்த 2024-ம் ஆண்டு, கேரளாவுக்குச் சென்று பணம் மற்றும் நகைகளை அனுப்புவதாக கூறிவிட்டு, சுஹேப்பும், அவரது மகன் அகில் நசீமும் சென்றுள்ளனர். அவர்கள் உறுதியளித்தபடி பணம், நகைகளை ரஷிதாவுக்கு அனுப்பவில்லை.
ஆகவே சுஹேப், அகில் நசீம் ஆகியோர் குறித்து கேரளாவில் விசாரித்தபோது அவர்கள், அங்கு தேநீர் கடை நடத்தி வருவது தெரியவந்துள்ளது. இதையடுத்து சுஹேப், அகில் நசீம் ஆகியோரை ரஷிதா செல்போனில் பலமுறை தொடர்பு கொண்டபோதும், அவர்கள் பதில் அளிக்காமல் தவிர்த்து வந்துள்ளனர்.
இதனால் அதிர்ச்சியடைந்த ரஷிதா திருவள்ளூர் தாலுகா காவல் நிலையத்திலும், முதல்வர் தனிப்பிரிவிலும் புகார் அளித்துள்ளார். அப்புகாரின் பேரில் திருவள்ளூர் தாலுகா போலீஸார் நேற்று முன்தினம் வழக்குப் பதிவு செய்து சுஹேப் மற்றும் அவரது மகன் அகில் நசீம் ஆகிய இருவரை தீவிரமாகத் தேடி வருகின்றனர்.
