ஓசூர்: ஓசூர் அருகே கல்லூரி மாணவி மூலம் இன்ஸ்டாகிராமில் பழக வைத்து, ரியல் எஸ்டேட் தொழில் செய்து வரும் இளைஞரிடம் ரூ.3 லட்சம் பணம் பறித்த 5 பேரை போலீஸார் கைது செய்தனர்.
கிருஷ்ணகிரி மாவட்டம் கெலமங்கலம் அருகே தம்மண்டரப்பள்ளியைச் சேர்ந்த நவீன்குமார் (29), ரியல் எஸ்டேட் தொழில் செய்து வருகிறார். இவரிடம் 20 வயது கல்லூரி மாணவி ஒருவர் இன்ஸ்டாகிராம் மூலம் செல்போன் எண்ணைப் பெற்று பேசி பழகி வந்துள்ளார். கடந்த 23-ம் தேதி ஓசூரை அடுத்த கெலவரப்பள்ளி அணையில் நவீன்குமாரும், அந்த மாணவியும் பேசிக்கொண்டிருந்தனர்.
அங்கு காரில் வந்த 5 பேர் கொண்ட கும்பலில் ஒருவர், தனது தங்கையிடம் எப்படி பேசலாம் எனக் கேட்டு நவீன்குமாரை மிரட்டியுள்ளார். பின்னர் அவரை காரில் பைரமங்கலத்துக்கு கடத்திச் சென்று பணம் கேட்டு மிரட்டியுள்ளனர். அவரிடம் பணம் இல்லாததால், அவர் அணிந்திருந்த நகையை அடமானம் வைத்து ரூ.3 லட்சம் பெற்றுக்கொண்டு அந்த கும்பல் சென்றது.
இதுகுறித்து நவீன்குமார் நல்லூர் காவல் நிலையத்தில் புகார் அளித்தார். அதன்பேரில் போலீஸார் வழக்குப் பதிவு செய்து விசாரணை நடத்தினர். இதில், கெலமங்கலத்தைச் சேர்ந்த ஹரிகரன் (22) என்பவர், தான் பழகி வந்த கல்லூரி மாணவி மூலம் நவீன்குமாரிடம் இன்ஸ்டாகிராமில் பழகச் செய்து, பின்னர் அவரை கெலவரப்பள்ளி அணைக்கு வரவழைத்து பணம் பறித்தது தெரியவந்தது. இதையடுத்து, ஹரிகரன் (22), கெலமங்கலத்தைச் சேர்ந்த அப்ராஸ் (24), பாலாஜி (23), நவீன்குமார் (24), தம்மநாயக்கனஅள்ளியைச் சேர்ந்த மகேந்திரன் (26) ஆகிய 5 பேரையும் நல்லூர் போலீஸார் கைது செய்தனர்.
