செல்லப்பாண்டி, கண்ணதாசன், அஷ்ரஃப் அலி, ஜெகதீஷ்
சென்னை: தமிழக அரசின் ரூ.22.35 கோடி நிதிமோசடி வழக்கில் 7 பேர் கைதுசெய்யப்பட்ட நிலையில், மோசடிப் பணம் 24 வங்கிக் கணக்குகளுக்கு மாற்றப்பட்டது அம்பலமாகியுள்ளது.
தமிழக அரசின் 15-வது நிதிக் குழுவின் சுகாதாரத் துறை மானியநிதி, கிராமப்புறங்களில் ஆரம்ப சுகாதாரக் கட்டமைப்புகளை மேம்படுத்துவதற்காக ஒதுக்கப்பட்டு வருகிறது. இந்த நிதி சென்னை நந்தனம் சிஐடி நகரில் உள்ள ஹெச்டிஎப்சி வங்கிக் கிளையில், ஊரக வளர்ச்சி மற்றும் ஊராட்சித் துறை இயக்குநர் பெயரில் தனி வங்கிக் கணக்கில் பராமரிக்கப்பட்டு வந்தது. இந்தக் கணக்கில் இருந்து நிதியைப் பெறவும், ஒப்பந்ததாரர்களுக்குப் பணம் வழங்கவும் உரிய அனுமதி பெற்ற வட்டார வளர்ச்சி அலுவலர்களுக்குத் தனித்தனியாக பயனர் பெயர் மற்றும் கடவுச்சொற்கள் வழங்கப்பட்டிருந்தன.
இந்நிலையில், கடந்த மாதம் 12-ம் தேதி முதல் 30-ம் தேதி வரையிலான கால கட்டத்தில் மர்ம நபர்கள் வங்கிக் கணக்கில் இருந்து, ரூ.22.35 கோடியை பல்வேறு வங்கிக் கணக்குகளுக்கு மாற்றினர். இதுகுறித்து ஊரக வளர்ச்சி மற்றும் ஊராட்சித் துறை இயக்குநரக கண்காணிப்பாளர் ராம்பிரசாத், சென்னை காவல் ஆணையரிடம் புகார் அளித்தார். அதன்பேரில், மத்திய குற்றப்பிரிவு சைபர் கிரைம் போலீஸார் விசாரணையைத் தொடங்கினர்.
இதில், வங்கியின் எஸ்என்ஏ எனப்படும் ஒற்றைக் கணக்கு நிர்வாகத்துக்காகப் பயன்படுத்தப்பட்ட இணையதளத்தின் வாயிலாக இந்த மோசடி நடைபெற்றது தெரியவந்தது. குறிப்பாக, ‘Squareuplive.com/rdprd’ என்ற இணையதளம் மூலம், பல்வேறு மின்னஞ்சல் முகவரிகளுடன் இணைக்கப்பட்ட வங்கிக் கணக்குகளுக்குப் பணம் மாற்றப்பட்டது கண்டறியப்பட்டது.
மேலும், நாகை கீழையூர், ராமநாதபுரம் மண்டபம், திருப்பூர் தாராபுரம் வட்டார வளர்ச்சி அலுவலகங்களின் பெயர்களில் இருந்த பயனர் அடையாளங்களைப் பயன்படுத்தி மோசடிநடைபெற்றிருப்பதும் தெரியவந்தது. இதன்படி, மொத்தம் 46 பரிவர்த்தனைகள் மூலம் ரூ.22 கோடியே 30 லட்சத்து 4,879 பல்வேறு நிறுவனங்கள் மற்றும் தனிநபர் வங்கிக் கணக்குகளுக்கு மாற்றப்பட்டுள்ளது.
இதில் சம்வியத் மார்க்கெட்டிங், கிருஷ்ணா கிருஷ்ணா ஸ்டோர், பாரத் கிரைன், நெக்ஸ்வோரா காமர்ஸ் பிரைவேட் லிமிடெட் நிறுவன வங்கிக் கணக்குகளுக்குப் பணம் சென்றுள்ளது. இதையடுத்து, சென்னை ஈக்காட்டுத்தாங்கலைச் சேர்ந்த செல்லப்பாண்டியன், திருவல்லிக்கேணி கரும்பூர் அண்ணாதுரை ஆகியோரும் இவர்களுக்கு உடந்தையாக இருந்த பெங்களூரு லோகநாதனும் சிறையில் அடைக்கப்பட்டனர்.
மேலும், இச்சம்பவத்தில் தொடர்புடைய மதுரையைச் சேர்ந்த அப்துல்ரஹ்மான், ஜெகதீஷ், சிவகங்கை அஷ்ரஃப் அலி, கண்ணதாசன் ஆகியோரையும் கைது செய்து போலீஸார் விசாரிக்கின்றனர். கைது செய்யப்பட்டவர்களிடம் இருந்து 7 செல்போன், 14 சிம் கார்டுகள், வங்கி காசோசலை புத்தகம் ஆகியவை பறிமுதல் செய்யப்பட்டுள்ளன.
அப்துல் ரஹ்மான், லோகநாதன், அண்ணாதுரை
போலீஸாரின் விசாரணையில், கைது செய்யப்பட்டவர்கள் சைபர் மோசடி கும்பலிடம் இருந்து கமிஷன் பெற்றுக் கொண்டு தங்களது வங்கிக்
கணக்குகளைப் பணப் பரிமாற்றத்துக்குப் பயன்படுத்த அனுமதித்திருப்பது தெரிய வந்துள்ளது. மேலும், இவர்களின் வங்கிக் கணக்குகள்வாயிலாக 24 வெவ்வேறு வங்கிக் கணக்குகளுக்குப் பரிமாற்றம் செய்யப்பட்டிருப்பதும் கண்டுபிடிக்கப்பட்டுள்ளது.
இதையடுத்து, மோசடிப் பணம் சென்ற வங்கிக் கணக்குகளின் உரிமையாளர்களைக் கண்டறிந்து அவர்களைக் கைது செய்யும் நடவடிக்கையில் போலீஸார் தீவிரமாக ஈடுபட்டுள்ளனர். மேலும், தமிழக அரசின் வங்கிக்கணக்கில் இருந்து கோடிக்கணக்கான ரூபாயை நூதன முறையில் திருடிய கும்பலின் மூளையாகச் செயல்பட்டவர்கள் யார், இந்த மோசடிக்குப் பின்னணியில் வேறு யாருக்கெல்லாம் தொடர்பு உள்ளது என்பது குறித்தும் மத்திய குற்றப்பிரிவு போலீஸார் விசாரித்து வருகின்றனர்.