பறிமுதல் செய்யப்பட்ட கிரிஸ்டல் மெத்தம்பெட்டமைன்.
நாகப்பட்டினம்: நாகை அருகே 137 கிலோ கிரிஸ்டல் மெத்தம்பெட்டமைன் பறிமுதல் செய்யப்பட்டதுதொடர்பாக கைதான 4 பேர் சிறையில் அடைக்கப்பட்டனர்.
நாகை மாவட்டம் வேளாங்கண்ணி அருகே பிரதாபராமபுரத்தில் ரூ.135 கோடி மதிப்பிலான மெத்தம்பெட்டமைன் போதைப் பொருளை மத்திய வருவாய் புலனாய்வு இயக்குநரக அதிகாரிகள் அக்.16-ம் தேதி பறிமுதல் செய்தனர்.
இந்த வழக்கில், தவெக மாவட்டச் செயற்குழு உறுப்பினராக இருந்தவரும், வழக்கறிஞருமான பூபாலன்(42), சுகன்(27), மணிகண்டன்(39), சதீஷ்குமார்(30) ஆகிய 4 பேரை கைது செய்தனர். அவர்களை நாகை சுங்கத் துறை அலுவலகத்துக்கு அழைத்துச் சென்று மத்திய வருவாய் புலனாய்வு இயக்குநரக அதிகாரிகள் தொடர்ந்து 30 மணி நேரம் தீவிர விசாரணை நடத்தினர்.
இந்நிலையில், நேற்று முன்தினம் இரவு 8 மணியளவில் சுங்கத் துறையினரின் விசாரணை நிறைவு பெற்றது. இதையடுத்து, கைது செய்யப்பட்ட பூபாலன் உள்ளிட்ட 4 பேரும் வேதாரண்யத்தில் உள்ள குற்றவியல் நடுவர் நீதிமன்ற நீதிபதி சுதாவின் வீட்டில் ஆஜர்படுத்தப்பட்டனர். அவர்களை அக்.30-ம் தேதி வரை காவலில் வைக்க நீதிபதி உத்தரவிட்டார். இதையடுத்து, 4 பேரும் நாகை கொண்டுவரப்பட்டு மாவட்ட சிறைச் சாலையில் அடைக்கப்பட்டனர்.
இதுகுறித்து மத்திய வருவாய் புலனாய்வு இயக்குநரகம் நேற்று அதிகாரப்பூர்வமாக வெளியிட்டுள்ள செய்திக்குறிப்பில் கூறியிருப்பதாவது: நாகை மாவட்ட கடலோரக் கிராமத்தில் இருந்து தடைசெய்யப்பட்ட செயற்கை போதைப் பொருளான 137 கிலோ கிரிஸ்டல் மெத்தம்பெட்டமைன் பறிமுதல் செய்யப்பட்டுள்ளது. வேளாங்கண்ணி அருகே பிரதாபராமபுரத்தில் 5 கிலோ எடை கொண்ட 27 வெள்ளி நிற பொட்டலங்கள் அடங்கிய 6 பைகள் மீட்கப்பட்டன. அந்த பொட்டலங்களில், உயர் தூய்மை கொண்ட மெத்தம்பெட்டமைன் இருந்தது.
இந்த போதைப் பொருள் நடுக்கடலில் ஒரு படகில் இருந்து மற்றொரு படகுக்கு மாற்றப்பட்டு, இலங்கைக்கு கடத்தப்படவிருந்தது. பறிமுதல் செய்யப்பட்ட சட்டவிரோத போதைப் பொருள் சந்தையின் மதிப்பு ரூ.100 கோடிக்கும் அதிகமாக இருக்கும் என மதிப்பிடப்பட்டுள்ளது. சமீப ஆண்டுகளில் தமிழகக் கடலோரப் பகுதியில் மேற்கொள்ளப்பட்ட மிகப்பெரிய போதைப்பொருள் பறிமுதல்களில் இதுவும் ஒன்று.
இதுதொடர்பாக 4 பேர் கைது செய்யப்பட்டுள்ளனர். இந்த சோதனையில் ரொக்கம் ரூ.10 லட்சம், 2 நான்கு சக்கர வாகனங்கள், ஒரு இருசக்கர வாகனம் ஆகியவை பறிமுதல் செய்யப்பட்டன. இதையடுத்து, பிடிபட்ட 4 பேரும் கைது செய்யப்பட்டு, நீதிமன்றக் காவலில் வைக்கப்பட்டுள்ளனர். இந்த நடவடிக்கையின் மூலம் ஒரு போதைப் பொருள் கடத்தல் வலை அமைப்பு வெற்றிகரமாகத் தகர்க்கப்பட்டுள்ளது. இவ்வாறு தெரிவிக்கப்பட்டுள்ளது.
