இயக்குநர், நடிகர்கள், ஒளிப்பதிவாளர் ஆகியோரின் பங்களிப்புகளைப் பற்றி பார்வையாளர்கள் அறிந்திருப்பார்கள். ஆனால் திரையில் ஒரு காட்சி தெளிவாகவும், கூர்மையாகவும் தோன்றுவதற்குப் பின்னால் முக்கியமான பங்களிப்பை வழங்கும் தொழில்நுட்பக் கலைஞர், ஃபோகஸ் புல்லர் அல்லது முதல் உதவி கேமராமேன்.
ஒளிப்பதிவாளரின் கற்பனையைத் துல்லியமாகத் திரையில் பதிவு செய்ய உதவும் அமைதியான நிபுணர் இவரே. ஒரு நடிகரின் கண்கள் துல்லியமாக ஃபோகஸில் இருப்பதும், ரேக் ஃபோகஸ் காட்சியில் பார்வையாளரின் கவனம் சரியான இடத்துக்கு நகர்வதும், கேமராவின் தொழில்நுட்ப செயல்பாடுகள் சீராக நடைபெறுவதும் இவரது பொறுப்பாகும்.
ஃபோகஸ் புல்லரின் பங்கு
மும்பை திரைப்படத் துறையில், குறிப்பாக ஹிந்தி திரைப்படங்களில், ஃபோகஸ் புல்லர் பெரும்பாலும் சுயாதீன தொழில்நுட்பக் கலைஞராக செயல்படுகிறார். அவர் நேரடியாக ஒளிப்பதிவாளருடன் இணைந்து பணியாற்றுவார்.
ஆனால் தென்னிந்தியத் திரைப்படத் துறையில், பெரும்பாலான கேமரா வாடகை நிறுவனங்கள் தங்களது கேமரா தொகுப்புகளுடன் அனுபவமிக்க ஃபோகஸ் புல்லர்களையும் அனுப்புகின்றன.
இவர்கள், கேமராவைப் பராமரிப்பது, லென்ஸ்களைச் சோதிப்பது, கேமரா மெனுக்களை இயக்குவது, ரெசல்யூஷன், ஃபிரேம் ரேட், லாக் செட்டிங்ஸ், எல்யூடி போன்ற அமைப்புகளை நிர்வகிப்பார்கள். இன்றைய டிஜிட்டல் யுகத்தில் பல ஃபோகஸ் புல்லர்கள் ஒளிப்பதிவாளருக்கு அடுத்தபடியாக கேமராவை நன்கு அறிந்திருப்பார்கள்.
பெரும்பாலானவர்கள் ஃபோகஸ் என்றால் படம் தெளிவாக இருப்பதென்று நினைக்கிறார்கள். ஆனால் ஃபோகஸ் என்பது ஒரு கதை சொல்லும் கருவி. ஒரு காட்சியில் யாரை பார்வையாளர்கள் கவனிக்க வேண்டும் என்பதை தீர்மானிப்பது பெரும்பாலும் ஃபோகஸ்தான்.
உதாரணமாக, ஒரு பெண் முன்புறத்தில் அமர்ந்திருக்கிறார். பின்னணியில் ஒருவர் அறைக்குள் நுழைகிறார். முதலில் பெண்ணின் மீது ஃபோகஸ் இருக்கும். பிறகு மெதுவாக பின்னணியில் இருக்கும் நபரின் மீது ஃபோகஸ் மாறும். இதுவே ரேக் ஃபோகஸ். எந்த வசனமுமின்றி இயக்குநர் பார்வையாளரின் கவனத்தை மாற்றிவிடுகிறார்.
ஒளிப்பதிவாளரின் கலைக் கருவியாக ஃபோகஸ்
இன்றைய ஒளிப்பதிவாளர்கள் ஒளி மற்றும் நிறங்களைப் போலவே ஃபோகஸையும் ஒரு கலை வடிவமாகப் பயன்படுத்துகிறார்கள். தேர்ந்தெடுக்கப்பட்ட ஃபோகஸ் (Selective Focus); ஒரு கூட்டத்தில் இருக்கும் ஒரே மனிதரை மட்டும் தெளிவாகக் காட்டலாம். இதன் மூலம் தனிமை, பயம், காதல், மன அழுத்தம் போன்ற உணர்வுகளை வெளிப்படுத்த முடியும்.
ஆழமற்ற ஃபோகஸ் (Shallow Depth of Field)
T1.5, T2 போன்ற அகல அபர்ச்சர்களில் படமாக்கும்போது பின்னணி மங்கலாக மாறும். இதனால் பார்வையாளரின் கவனம் முழுவதும் கதாபாத்திரத்தின் கண்களிலேயே இருக்கும்.
ஆழமான ஃபோகஸ்
சில இயக்குநர்கள் மற்றும் ஒளிப்பதிவாளர்கள் முன்புறம் முதல் பின்னணி வரை அனைத்தையும் ஃபோகஸில் வைத்திருப்பார்கள். இதன் மூலம் பார்வையாளர்கள் எந்தப் பகுதியைப் பார்க்க வேண்டும் என்பதை அவர்களே தேர்வு செய்ய முடியும்.
ஒளிப்பதிவாளர் - ஃபோகஸ் புல்லரின் தொடர்பு
ஒரு சிறந்த ஷாட் உருவாக ஒளிப்பதிவாளரும் ஃபோகஸ் புல்லரும் தொடர்ந்து தகவல் பரிமாற்றத்தில் இருக்க வேண்டும்.ஒளிப்பதிவாளர் பொதுவாக, நடிகர் எங்கு நிற்பார், எவ்வளவு தூரம் நடப்பார், ஃபோகஸ் எப்போது மாற வேண்டும், எந்தக் கண் ஃபோகஸில் இருக்க வேண்டும் என்பதை முன்கூட்டியே விவரிப்பார்.
பல அனுபவமிக்க ஒளிப்பதிவாளர்கள் ஃபோகஸ் புல்லருடன் இணைந்து ரிகர்சல் செய்வார்கள். சில நேரங்களில், “இரண்டாவது வசனத்தில் ரேக் ஃபோகஸ்’’, “அவர் திரும்பும்போது கண்களில் ஃபோகஸ்’’, “பின்னணி கதவு திறந்ததும் ஃபோகஸ் மாற்றுங்கள்” என்று துல்லியமான வழிகாட்டுதல்களும் வழங்கப்படுகின்றன. அதனால்தான் சிறந்த ஃபோகஸ் புல்லர் தொழில்நுட்ப நிபுணர் மட்டுமல்ல; கதை சொல்லலையும் புரிந்துகொள்ளும் கலைஞராக இருக்க வேண்டும்.
ஃபாலோ ஃபோகஸ் மற்றும் அளவீடுகள்
நடிகர் நகரும்போது ஃபோகஸை அவருடன் நகர்த்துவது ஃபாலோ ஃபோகஸ். இதற்காக டேப் மெஷர், லேசர் டிஸ்டன்ஸ் மீட்டர், வயர்லெஸ் ஃபோகஸ் சிஸ்டம் போன்ற கருவிகளை ஃபோகஸ் புல்லர் பயன்படுத்துகின்றனர். கேமராவின் சென்சார் பிளேனிலிருந்து நடிகரின் கண்கள் வரை தூரம் அளக்கப்படுகிறது. அனுபவமிக்க ஃபோகஸ் புல்லர்கள் பல நேரங்களில் வெறும் கண் மதிப்பீட்டின் மூலமே தூரத்தைக் கணித்துவிடுவார்கள்.
லென்ஸ் மாற்றம் மற்றும் ஜூம் கட்டுப்பாடு
லென்ஸ் மாற்றுதல், லென்ஸ் சுத்தம் செய்தல், பேக் ஃபோகஸ் சரிபார்த்தல், ஜூம் இயக்கத்தின் போது ஃபோகஸ் பராமரித்தல் போன்ற பணிகளையும் மேற்கொள்கிறார். ஃபோகஸ் புல்லர். சில ஜூம் ஷாட்களில் ஜூமும் ஃபோகஸும் ஒரே நேரத்தில் இயக்கப்பட வேண்டும். இதற்கு மிகவும் உயர்ந்த தொழில்நுட்பத் திறன் தேவைப்படுகிறது.
நவீன டிஜிட்டல் சினிமாவில் ஃபோகஸ் புல்லர்
இன்றைய ஃபோகஸ் புல்லர்கள் வெறும் ஃபோகஸ் நிபுணர்கள் அல்ல. ஃபால்ஸ் கலர் அமைத்தல், வேவ்ஃபார்ம் மானிட்டர் கண்காணித்தல், எக்ஸ்போஷர் உதவி, எல்யூடி ஏற்றுதல், கேமரா மெனு நிர்வாகம் போன்ற பணிகளிலும் ஒளிப்பதிவாளருக்கு உதவுகின்றனர்.
கேமரா பாதுகாப்பு
படப்பிடிப்பின் போது மழை, மணல், வெடிப்பு, கண்ணாடி சிதறல்கள், ஆக் ஷன் காட்சிகளின் போது அபாயங்கள் ஏற்படலாம். அப்போது கேமராவின் முன்புறத்தில் பாதுகாப்பு கண்ணாடி பொருத்துவது ஃபோகஸ் புல்லரின் பொறுப்பாகும். இது விலையுயர்ந்த லென்ஸ்களையும் சென்சார்களையும் பாதுகாக்கிறது.
T2 மற்றும் அதற்குக் கீழான அபர்ச்சர்களின் சவால்
இன்றைய சினிமாவில் பல ஒளிப்பதிவாளர்கள் T2, T1.5, T1.3 போன்ற அகல அபர்ச்சர்களில் படமாக்க விரும்புகிறார்கள். இதனால் பின்னணி அழகாக மங்கும். கதாபாத்திரம் பிரிந்து தெரியும்.
காட்சிக்கு சினிமாடிக் தோற்றம் கிடைக்கும். ஆனால் இது ஃபோகஸ் புல்லருக்கு மிகப்பெரிய சவால். 85 மில்லிமீட்டர் லென்ஸில் T1.5 பயன்படுத்தும்போது, ஃபோகஸ் பகுதி சில சென்டிமீட்டர்கள் மட்டுமே இருக்கலாம். நடிகர் சிறிது முன் நகர்ந்தால்கூட ஃபோகஸ் தவறிவிடும். அந்தச் சூழலில் ஃபோகஸ் புல்லரின் அனுபவம், கணிப்பு, திறன் மற்றும் துல்லியம் மிக அவசியமாகிறது.
மனிதக் கண் மற்றும் தொழில்நுட்பத்தின் இணைவு
லேசர் கருவிகள், வயர்லெஸ் ஃபோகஸ் அமைப்புகள், டிஜிட்டல் மானிட்டர்கள் அனைத்தும் உதவினாலும் ஃபோகஸ் புல்லரின் மிகப் பெரிய பலம் அவரது அனுபவம்தான்.
நடிகரின் அசைவுகளை முன்கூட்டியே கணிப்பதும், கேமரா இயக்கத்தைப் புரிந்துகொள்வதும், ஒளிப்பதிவாளரின் காட்சி மொழியை உணர்வதும் அவரை சிறந்த ஃபோகஸ் புல்லராக மாற்றுகிறது.
திரைப்படத்தில் ஒளி, லென்ஸ், கேமரா மற்றும் இயக்கம் ஆகிய அனைத்தையும் இணைக்கும் மறைமுகக் கலைஞர் ஃபோகஸ் புல்லர். அவர் பார்வையாளரின் கவனத்தை வழிநடத்தும் கதைசொல்லி.
ஒளிப்பதிவாளர் ஒரு காட்சியை உருவாக்குகிறார்; ஃபோகஸ் புல்லர் அந்தக் காட்சியில் எதைப் பார்க்க வேண்டும் என்பதை பார்வையாளருக்குச் சொல்கிறார்.
(புதன்தோறும் ஒளிகாட்டுவோம்)
- cjrdop@gmail.com