சென்னை: ரஜினிகாந்த நடித்துள்ள ‘ஜெயிலர் 2’' திரைப்படத்தின் வெளியீட்டுத் தேதியை புதிய ப்ரோமோ வீடியோவுடன் படக்குழு வெளியிட்டுள்ளது.
நெல்சன் திலீப்குமார் இயக்கத்தில், ரஜினிகாந்த் நடிக்கும் படம் ‘ஜெயிலர் 2’. இதில் ரஜினியுடன் எஸ்.ஜே.சூர்யா, சுராஜ் வெஞ்சரமூடு, ரம்யா கிருஷ்ணன், யோகிபாபு, மேக்னா ராஜ் உள்பட பலர் நடித்துள்ளனர். மோகன்லால், சிவ ராஜ்குமார் கவுரவ வேடத்தில் நடிக்கின்றனர். இதில் முக்கிய வேடத்தில் நடிக்கத் தெலுங்கு ஹீரோ பாலகிருஷ்ணாவிடம் கேட்டனர். அவர் மறுத்ததை அடுத்து ஷாருக்கான் நடிப்பதாகக் கூறப்பட்டது. அவர் கடைசி நேரத்தில் விலகியதை அடுத்து இப்போது ஹிருத்திக் ரோஷன் நடிக்க இருக்கிறார். அனிருத் இசையமைக்கிறார்.
இந்த நிலையில் இப்படம் வரும் அக்டோபர் 15 அன்று திரையரங்குகளில் உலகளவில் வெளியாகிறது. சன் பிக்சர்ஸ் நிறுவனம் வியாழக்கிழமை (ஜூலை 2) இது தொடர்பான பிரத்யேக ப்ரோமோவை வெளியிட்டுள்ளது, அனிருத்தில் அதிரடியான பின்னணி இசையுடன், நிழல்களுக்கு நடுவிலிருந்து ரஜினிகாந்த் கம்பீரமாக நடந்து வரும் காட்சிகள் இணையத்தில் வரவேற்பைப் பெற்று வருகின்றன.
கடந்த 2023ஆம் ஆண்டு வெளியான 'ஜெயிலர்' முதல் பாகம், அந்த ஆண்டின் மிக அதிக வசூல் செய்த தமிழ் திரைப்படமாக சாதனை படைத்தது. குறிப்பாக மோகன்லால், சிவராஜ்குமார் ஆகியோரின் சிறப்புத் தோற்றங்களும், விநாயகனின் வில்லன் கதாபாத்திரமும் ரசிகர்களை வெகுவாகக் கவர்ந்தன. அதன் தொடர்ச்சியாக உருவாகும் இரண்டாம் பாகத்திற்கு விஜய் கார்த்திக் கண்ணன் ஒளிப்பதிவு செய்ய, ஆர்.நிர்மல் படத்தொகுப்புப் பணிகளைக் கவனித்துள்ளார்.
இத்திரைப்படத்தைத் தொடர்ந்து, கமல்ஹாசனின் ராஜ் கமல் ஃபிலிம்ஸ் இன்டர்நேஷனல் தயாரிப்பில், அஸ்வத் மாரிமுத்து இயக்கத்தில் ‘தர்மன்' படத்தில் ரஜினிகாந்த் நடித்து வருகிறார்.
