ஐமேக்ஸ் என்பது இமேஜ் மேக்ஸிமம் எனப்படும் பெரிய திரையைக் கொண்ட திரையரங்க வடிவம். திரையின் அகலத்தை விட உயரத்தின் அடிப்படையில் அமைக்கப்பட்ட, முழுமையான திரையரங்க அனுபவத்தை வழங்கும் அமைப்பு.
திரையரங்கக் கட்டமைப்பு, திரை வடிவமைப்பு, அதிநவீன இரட்டை புரொஜெக் ஷன் தொழில்நுட்பம், துல்லியமான ஒலி அமைப்பு, கதை சொல்லும் கேமரா மொழி, படமாக்கும் முறை (கேப்சர்), நவீன மாற்றுச் செயல்முறை (மாஸ்டரிங்), மற்றும் வெளியீட்டுத் திட்டமிடல் (ரிலீஸ் ஸ்ட்ரேட்டஜி) ஆகிய அனைத்தையும் ஒருங்கிணைத்து செயல்படுகிறது ஐமேக்ஸ் நிறுவனம்.
பிரம்மாண்டமும் வடிவமைப்பும்: இவ்வகைத் திரையரங்குகளின் தனித்துவமே அதன் பிரம்மாண்டமான பரிமாணங்கள் தான். ஐமேக்ஸ் திரையின் சராசரி உயரம் 60 முதல் 70 அடிகள் வரை இருக்கும். பாரம்பரிய வைடு ஸ்கிரீன் வடிவங்கள் அகலத்தை மட்டுமே வலியுறுத்தும் போது, ஐமேக்ஸ் காட்சியில் உயரம் வியத்தகு அளவில் அதிகரிக்கப்படுகிறது.
இதனால் வானம், கட்டிடங்களின் முழு நீளம், மனித உருவங்கள் மற்றும் நிலப்பரப்பின் அளவு ஆகியவை முழுமையாகக் காட்சிக்குள் வருகின்றன. பார்வையாளரின் பக்கப் பார்வை வரை காட்சி நிரம்புவதால், இந்தத் திரை அனுபவம் முற்றிலும் முழுமையாக உணரப்படுகிறது. ஐமேக்ஸ் திரையரங்குகள் ஸ்டேடியம் சீட்டிங் முறையில் வடிவமைக்கப்படுகின்றன.
ஒவ்வொரு வரிசையும் படிப்படியாக உயர்ந்து, பார்வையாளரின் கண் பார்வை இயல்பாகவே திரையின் மையத்தை நோக்கியே அமைகிறது. ஐமேக்ஸ் ஒலி அமைப்பும் இதற்கு ஈடு கொடுக்கும் வகையில் வடிவமைக்கப்பட்டுள்ளது.
இத்தகைய திரையரங்குகளில் பயன்படுத்தப்படும் அதிநவீன ஒலி அமைப்பு, சாதாரண திரையரங்க ஒலிப்பதிவை விட 5 மடங்கு அதிக ஒலித்திறனைக் கொண்டிருக்கும்.
தொழில்நுட்ப சாகசம்: ஃபிலிம், டிஜிட்டல் மற்றும் டி.எம்.ஆர்: ஒரிஜினல் ஐமேக்ஸ் கேமராக்கள் ஹாலிவுட்டில் மட்டுமே கிடைக்கின்றன. அவை ஃபிலிமில் படமாக்கப்படுகின்றன. ஐமேக்ஸ் முதலில் அதன் புகழ்பெற்ற 70 எம்எம் திரைப்பட (ஃபிலிம்) வடிவில் தான் தொடங்கியது. இந்த ஃபிலிம் வழக்கமான 35 எம்எம் ஃபிலிம் போல கேமராவில் செங்குத்தாக இல்லாமல் கிடைமட்டமாக ஓடுகிறது.
இதன் ஒரு ஃபிரேம், 15-பெர்ஃப் அளவு கொண்டது. சாதாரண 35 எம்எம் ஃபிலிமை விட, சுமார் 4 மடங்கு பெரியது. இதன் 1.40:1 அஸ்பெக்ட் ரேஷியோவைத் திரையில் பார்க்கும் போது, அது கிட்டத்தட்ட 18கே தெளிவுக்கு (ரெசல்யூஷன்) இணையானதாக இருக்கும்.
இந்த மிக உயர்ந்த தெளிவு, ஆழம், மற்றும் இயல்பான காட்சித் தன்மையே ஒரிஜினல் ‘ஐமேக்ஸ் ஃபிலிம் ஃபார்மட்’டின் மிகப்பெரிய வெற்றியாகும். ஐமேக்ஸ் என்பது கேப்சர் ஃபார்மட்டாகவும் (நேரடியாகப் படமாக்குவது), ரிலீஸ் ஃபார்மட்டாகவும் (வெளியீட்டு வடிவம்) செயல்படக்கூடிய ஒரே அமைப்பு. ஆனால் அதற்குப் போட்டியாக உள்ள பி.எக்ஸ்.எல், எபிக் போன்றவை முழுவதும் ரிலீஸ் ஃபார்மட்டுகள் மட்டுமே.
அவை படம் எடுக்கப்படும் வடிவங்கள் அல்ல; பெரிய திரை மற்றும் மேம்பட்ட ஒலி அனுபவத்தை மட்டுமே வழங்குகின்றன. ஐமேக்ஸ் போல கூடுதல் காட்சியை (எக்ஸ்ட்ரா ஃபிரேம் ஹைட்) அவை வழங்குவதில்லை.
டிஜிட்டல் மீடியா ரீமாஸ்ட்ரிங்: மாற்று செயல்முறை: பெரும்பாலான இந்தியத் திரைப்படங்கள் ஒரிஜினல் ஐமேக்ஸ் ஃபிலிமில் நேரடியாகப் படமாக்கப்படுவதில்லை. ‘பொன்னியின் செல்வன்,’ ‘காந்தாரா’ போன்ற பல படங்கள் பாரம்பரிய டிஜிட்டல் சினிமா கேமரா அல்லது ஐமேக்ஸ் நிறுவனம் பரிந்துரைத்த மற்ற கேமராக்களில் படமாக்கப்பட்டு, பின்னர் ஐமேக்ஸ் வடிவமாக மாற்றப்பட்டன.
இந்த மாற்றுச் செயல்முறை டிஜிட்டல் மீடியா ரீமாஸ்ட்ரிங் என்று அழைக்கப்படுகிறது டி.எம்.ஆர் என்பது படத்தை பெரிதாக்குவது அல்ல! இது மிக நுணுக்கமான செயல்முறையாகும். ஒரு திரைப்படம் கிரேடிங் செய்யப்பட்ட பிறகு 4கே அல்லது 8கே தெளிவுத்திறனில் ஸ்கேன் செய்யப்படும்.
பிறகு ஐமேக்ஸ் கார்ப்பரேஷனின் சிறப்பு அலகில் அங்குள்ள நிபுணர்களால் ஃபிரேமிங், கான்ட்ராஸ்ட், கூர்மை, ஒளிர்வு, ஒலி ஆகியவை ஐமேக்ஸ் தரத்துக்கு மிக நுணுக்கமாக மாற்றியமைக்கப்படுகின்றன. மிகப்பெரிய திரையில் எக்ஸ்ட்ரா ஃபிரேம் ஹைட்டுடன் திரைப்படத்தை புரொஜெக்ட் செய்யும்போது காட்சியின் செறிவு துளியும் குறையாமல் இருப்பதை இந்த டி.எம்.ஆர் உறுதி செய்கிறது. இந்தச் செயல்முறைக்கு சுமார் 10 நாட்கள் முதல் 3 வாரங்கள் வரை கூட ஆகலாம்.
நோலனும் சினிமா மொழியும்: ஐமேக்ஸ் கேமராக்கள் ஆரம்பத்தில் அறிவியல் ஆவணப் படங்களுக்கே பயன்படுத்தப்பட்டன. ஆனால் இயக்குநர் கிறிஸ்டோஃபர் நோலன், தி டார்க் நைட், இன்டர்ஸ்டெல்லார், ஓபன்ஹைமர் போன்ற படங்களில் சுமார் 90 சதவிகிதக் காட்சிகளை ஒரிஜினல் ஐமேக்ஸ் ஃபிலிம் கேமராவிலேயே படமாக்கி, ஐமேக்ஸை பிரம்மாண்டமான கதை சொல்லும் கேமரா மொழியாகவும் மாற்றினார்.
இன்று ஒரு திரைப்படம் சினிமாஸ்கோப், 3டி, ஐமேக்ஸ், ஓடிடி ஆகிய பல்வேறு ஃபார்மட்டுகளில் வெளியிடப்படுகிறது. ஆனால், பெரும்பாலான திரையரங்குகள் சினிமாஸ்கோப் வடிவத்திலேயே உள்ளன. அதனால் ஒரு திரைப்படத்தை உருவாக்கும்போதே அதனை அனைத்து வடிவங்களுக்கும் ஏற்றவாறு படமாக்க வேண்டும். இதில் ஐமேக்ஸுக்காகப் படம் எடுப்பது தனிப்பட்ட தொழில்நுட்ப ஒழுங்கையும் சிந்தனையையும் கோருகிறது.
வெளியீட்டுத் திட்டமிடல் மற்றும் இந்திய சினிமா: ஐமேக்ஸில் திரைப்படத்தை வெளியிட வேண்டுமென்றால் ரிலீஸ் தேதியை முன்பே உறுதியாக நிர்ணயிக்க வேண்டும். ஐமேக்ஸ் விதிமுறையின்படி, குறிப்பிட்ட நாளில் ஒரு நாளுக்கு ஒரு திரைப்படம் மட்டுமே முக்கிய வெளியீடாக திரையிடப்படும். அதனால் தயாரிப்பாளர்கள் தங்கள் திரைப்படத்தின் வெளியீட்டுத் தேதியை முன்கூட்டியே பதிவு செய்து லாக் செய்ய வேண்டும்.
இத்தகைய தொழில்முறை சவால்கள் இருந்தபோதிலும், இந்தியச் சினிமா தொடர்ந்து ஐமேக்ஸ் தொழில்நுட்பத் தரத்தை நோக்கி முன்னேறி வருகிறது. இன்று ஐமேக்ஸில் வெளியிடப்படும் பெரும்பாலான இந்தியப் படங்கள் 1.90:1 வடிவில் திரையிடப்படுகின்றன.
சில குறிப்பிட்ட ஐமேக்ஸ் திரையரங்குகளில் 1.40:1 முழு உயர ஃபிரேமும் இயக்கப்படுகிறது. ராஜமவுலி இயக்கும் ‘வாரணாசி’ படம் 1.40:1 முழு உயர ஐமேக்ஸ் வடிவில் வெளியிடப்படவுள்ளதாக அறிவிக்கப்பட்டது. இது இந்திய சினிமாவை உலகத்தரத்துடன் நேரடியாக இணைக்கும் முக்கியமான முன்னேற்றமாகப் பார்க்கப்படுகிறது.
ஒரு திரைப்படம் ஐமேக்ஸில் வெளியிடப்படுவதைப் பெருமையானதாக வியாபார உலகம் கருதுகிறது. அதனால் இந்தியாவில் ஐமேக்ஸ் திரையரங்குகளின் எண்ணிக்கை வருடந்தோறும் உயர்ந்துகொண்டே இருக்கின்றன.
(புதன்தோறும் ஒளி காட்டுவோம்)
- cjrdop@gmail.com