ராஜு முருகன் இயக்கத்தில் சசிகுமார் நடித்துள்ள படம், ‘மை லார்ட்’. சைத்ரா ஜே. ஆச்சார், ஜெயப்பிரகாஷ், குரு சோமசுந்தரம், ஆஷா சரத், கோபி நயினார் உள்ளிட்ட பலர் நடித்துள்ளனர். பிப். 13-ல் வெளியான இப்படம் வரவேற்பைப் பெற்றதை அடுத்து இதன் வெற்றி விழா சென்னையில் நடைபெற்றது. படக்குழுவினர் கலந்து கொண்டனர்.
நடிகர் சசிகுமார் பேசும்போது, “இந்தப் படத்தில் நடிகராக, என்னை இன்னொரு விதமாக மாற்றிக் காட்டியிருக்கிறார் ராஜு முருகன். எல்லாவற்றையும் நான் பார்த்துக்கொள்கிறேன் என சொல்லக் கூடிய தயாரிப்பாளர் அம்பேத்குமாரின் மனது பெரிய விஷயம்.
நல்ல இயக்குநரும், நல்ல தயாரிப்பாளரும் தோற்றுப் போகக் கூடாது. எப்போதும் ஜெயிக்க வேண்டும் என்பதுதான் என் எண்ணம். முதல் நாள் கலெக் ஷனை பார்த்துவிட்டு எல்லோருக்கும் பயம் வந்தது, ஆனால் எனக்கு தைரியமாக இருந்தது. ஏனென்றால் எல்லாருமே நல்ல படம் எனச் சொன்னார்கள்.
அது கண்டிப் பாக மக்களிடம் சேரும் என்ற நம்பிக்கை எனக்கு இருந்தது. அது நடந்துள்ளதில் மகிழ்ச்சி. ‘அயோத்தி’ படத்தில் நான் பார்த்த அனுபவம் தான் எனக்கு இந்த தைரியத்தைக் கொடுத்தது. அந்தப்படமும் இரண்டாவது, மூன்றாவது வாரத்தில்தான் வசூலை எடுத்தது. அதே மாதிரி இந்தப் படமும் கண்டிப்பாக எடுக்கும் என்ற நம்பிக்கை இருக்கிறது” என்றார்.
