விஷால் நடித்த ‘செல்லமே’, தமன்னா நடித்த ‘ஆனந்த தாண்டவம்’ படங்களை இயக்கிய, காந்தி கிருஷ்ணா இப்போது இயக்கியுள்ள படம் ‘பிரேக் பாஸ்ட்’. புதுமுகங்கள் ராணவ், ரோஸ்லின், க்ரித்திக் மோகன், அமிதா ரங்கநாதன் மற்றும் அர்ச்சனா, சம்பத்ராம், ரவிமரியா நடித்துள்ளனர்.
பிரேம் கிளாசிக் பிக்சர்ஸ் சார்பில் கிரிஜா வரதராஜ் தயாரித்துள்ளார். ஜி.வி.பிரகாஷ் குமார் இசை அமைத்துள்ளார். ஏப்.24-ல் வெளியாகும் இப் படத்தின் இசை வெளியீட்டு விழா சென்னையில் நடைபெற்றது. படக்குழுவினர் கலந்துகொண்டனர்.
நடிகை அமிதா பேசும்போது, “காதலிப்பது எல்லோருக்கும் எளிது. ஆனால், காதலில் நிலைத்து நிற்பது கடினம். ஏன் என்றால் நம் எல்லோரிடமும் ஒரு வெற்றிடம் இருக்கிறது. அதை நிரப்ப நம் தாயின் அன்பை, துணையிடம் தேடும்போது தான் பிரச்சினை ஆரம்பிக்கிறது. திருமணம் ஆனவர்கள் இந்தப் படத்தை நிச்சயம் பார்க்க வேண்டும். சின்ன ஈகோ கூட எப்படி பெரிய பிரச்சினையாக மாறுகிறது என்பதை இந்தக் கதை சொல்லும்” என்றார்.
இயக்குநர் காந்தி கிருஷ்ணா, “இதில் அனைவரும் சிறந்த நடிப்பை வெளிப்படுத்தியுள்ளனர். இசையமைப்பாளர், ஒளிப்பதிவாளர், தயாரிப்பாளர்கள் அனைவருக்கும் மிக்க நன்றி. கடந்த 10 வருடத்துக்குள் நடந்த கலாச்சார மற்றும் உளவியல் ரீதியான மாற்றங்களைப் பற்றி இதில் பேசியிருக்கிறோம். இந்த மாற்றங்களால் நிறைய சந்தோஷங்களை இழந்திருக்கிறோம். அதை எப்படிச் சரி செய்யலாம் என்று இப்படத்தில் சொல்லியிருக்கிறோம்” என்றார்.
