ரிச்சர்ட் ரிஷி, ரக் ஷனா இந்துசுதன், நட்டி நடராஜ், ஒய்.ஜி.மகேந்திரன், சரவண சுப்பையா என பலர் நடித்துள்ள படம், ‘திரவுபதி 2’. மோகன் ஜி இயக்கியுள்ள இப்படத்துக்கு ஜிப்ரான் இசை அமைத்துள்ளார்.
நேதாஜி புரொடக்ஷன்ஸ், சோழ சக்ரவர்த்தி மற்றும் ஜி.எம். ஃபிலிம் கார்ப்பரேஷன் இணைந்து தயாரித்துள்ள இப்படத்துக்குத் தணிக்கை குழு யு/ஏ சான்றிதழ் கொடுத்துள்ளது. இதில் மூன்று வில்லன்கள் நடித்துள்ளனர். அதில் முதன்மை வில்லனாக சிராக் ஜானி நடித்துள்ளார். அவரை படக்குழு அறிமுகப்படுத்தியுள்ளது.
இயக்குநர் மோகன் ஜி கூறும்போது, “முகமது பின் துக்ளக் கதாபாத்திரத்தில் சிராக் நடித்துள்ளார். வெறும் வில்லனாக மட்டுமல்லாது புத்திசாலித்தனம் நிறைந்த தனது சொந்த முடிவுகளின் விளைவுகளைத் தைரியமாக எதிர்கொள்பவராக வருகிறார்.
உடல் ரீதியாக வலுவாகவும் அதேநேரம், சிறந்த நடிப்பை உணர்வுபூர்வமாக கொண்டு வரும் வகையிலான நடிகரை எதிர்பார்த்தோம். சிராக் முழு ஈடுபாட்டுடன் அந்த கதாபாத்திரத்துக்குத் தேவையான நடிப்பைக் கொடுத்துள்ளார்” என்றார். இப்படத்தின் டிரெய்லர் மற்றும் இசை விரைவில் வெளியாக இருக்கிறது.
