வெள்ளித்திரையில் மீண்டும் சூர்யா - ஜோதிகா ஜோடி

'இது நம்ம ஆளு' படத்தைத் தொடர்ந்து பாண்டிராஜ் இயக்கவுள்ள படத்தில் நாயகன், நாயகியாக நடிக்க இருக்கிறார்கள் சூர்யா - ஜோதிகா நட்சத்திர தம்பதியர்.

சிம்பு, நயன்தாரா, சூரி மற்றும் பலர் நடித்து வரும் 'இது நம்ம ஆளு' படத்தை இயக்கி வருகிறார் பாண்டிராஜ். தனது தம்பி குறளரசன் இசையமைப்பாளராக அறிமுகமாகும் இப்படத்தை, சிம்புவே தயாரித்துள்ளார். இப்படத்தின் இறுதிகட்ட பணிகள் நடைபெற்று வருகிறது. விரைவில், ஃபர்ஸ்ட் லுக் டீசர் வெளிவரவுள்ளது.

இப்படத்தைத் தொடர்ந்து இயக்குநர் பாண்டிராஜ் இயக்கவுள்ள படம் குறித்து பல்வேறு செய்திகள் வலம் வந்தன.

இதனை உறுதிப்படுத்தும் வகையில், இன்று காலை சூர்யா தயாரிப்பில் பாண்டிராஜ் இயக்கும் படத்தின் பூஜை நடைபெற்றது. இப்படத்தினை 'பசங்க' பாணியில் பாண்டிராஜ் இயக்க இருக்கிறார்.

இப்படத்தில் நடிக்கவிருக்கும் குழந்தை நட்சத்திரங்கள் தேர்வு அனைத்தும் முடிந்துவிட்டது. குழந்தைகளுக்கு அப்பா - அம்மாவாக சூர்யா, ஜோதிகா நடிக்க இருக்கிறார்கள். பாலசுப்பிரமணியம் ஒளிப்பதிவு செய்கிறார். சூர்யா தயாரிக்கும் முதல் படமாக அமையவுள்ளது இப்படம்.

'இது நம்ம ஆளு' படம் வெளியாகும் முன்பே இப்படத்தின் படப்பிடிப்பு துவங்க இருக்கிறது. இயக்குநர் வெங்கட்பிரபுவின் படத்தின் படப்பிடிப்பிற்கு முன்பே சூர்யா இப்படத்தில் கவனம் செலுத்த இருக்கிறார்.

இன்று காலை நடைபெற்ற பூஜையின் புகைப்படத்தினை இயக்குநர் பாண்டிராஜ் தனது ட்விட்டர் தளத்தில் வெளியிட்டு இருப்பது குறிப்பிடத்தக்கது.