‘பப்ளிக்’ அரசியல் பேசும் படம்: இயக்குநர் தகவல்

கே.கே.ஆர் சினிமாஸ் தயாரிப்பில், ரா.பரமன் இயக்கியுள்ள படம், ‘பப்ளிக்’. இதில் சமுத்திரக்கனி, காளி வெங்கட், ரித்விகா, மு.ராமசாமி, கோவிந்தமூர்த்தி உட்பட பலர் நடித்துள்ளனர். இந்தப் படத்தின் போஸ்டர்கள் கவனத்தை ஈர்த்துள்ளன. ராஜேஷ் யாதவ், வெற்றி ஒளிப்பதிவு செய்துள்ள இந்தப் படத்துக்கு டி.இமான் இசை அமைத்துள்ளார்.

படம்பற்றி இயக்குநர் ரா.பரமன் கூறியதாவது: இது முழுக்க அரசியல் பற்றி பேசும்படம். எல்லா அரசியல் கட்சிக்கும் தொண்டர்கள் முக்கியம். ஆனால், அந்தத் தொண்டர்கள் என்னவாக இருக்கிறார்கள் என்பது பற்றி இந்தப் படம் பேசும். தொண்டர்கள் மத்தியில் இருக்கும் அரசியலையும் இந்தப் படம் சொல்கிறது. நையாண்டியும் விழிப்புணர்வு விஷயங்களும் படத்தில் இருக்கும். சமுத்திரக்கனி, காளி வெங்கட், மு.ராமசாமி ஆகியோர் அரசியல் கட்சித் தொண்டர்களாக நடித்துள்ளனர். படப்பிடிப்பு முடிந்துவிட்டது. அடுத்த மாதம் வெளியிட திட்டமிட்டுள்ளோம். இவ்வாறு பரமன் தெரிவித்துள்ளார்.