விஜய் நடிப்பில் உருவாகும் 'பைரவா'வில் சன்னி லியோன் நடனமாட இருப்பதாக வெளியாகி இருக்கும் செய்திக்கு படக்குழு மறுப்பு தெரிவித்தது.
பரதன் இயக்கத்தில் விஜய் நடிப்பில் உருவாகி வரும் படம் 'பைரவா'. பொங்கல் வெளியீடாக இப்படம் வெளியாக இருக்கிறது. சுவிட்சர்லாந்தில் விஜய் - கீர்த்தி சுரேஷ் பங்கேற்கும் பாடலை படமாக்க சென்றிருக்கிறது படக்குழு.
மேலும், இப்பாடலோடு சுமார் 98% படப்பிடிப்பு முடிவடைந்துவிடும். இவை போக இன்னும் 5 காட்சிகள் மட்டுமே பாக்கி இருப்பதாக படக்குழு தெரிவித்திருக்கிறது. சுகுமார் ஒளிப்பதிவு செய்து வரும் இப்படத்துக்கு சந்தோஷ் நாராயணன் இசையமைத்து வருகிறார். இப்படத்தின் முதல் பாதியைப் பார்த்துவிட்டு, இயக்குநர் பரதனைப் பாராட்டியிருக்கிறார் விஜய்.
இந்நிலையில், இப்படத்தில் ஒரு பாடலுக்கு சன்னி லியோன் நடனமாட இருப்பதாக செய்திகள் வெளியாகி உள்ளன.
இது குறித்து படக்குழுவிடம் விசாரித்தபோது "மொத்த படத்தையுமே முடித்துவிட்டோம். இதற்கு மேல் பாடல் படப்பிடிப்பு என்பதே இல்லை. சன்னி லியோன் செய்தி முற்றிலும் தவறானது" என்று தெரிவித்தார்கள்.
இப்படத்தைத் தொடர்ந்து அட்லீ இயக்கத்தில் உருவாகும் படத்துக்கு தேதிகள் ஒதுக்கியிருக்கிறார் விஜய். தேனாண்டாள் பிலிம்ஸ் நிறுவனம் இப்படத்தை தயாரிக்கிறது.