சூர்யா நடிப்பில் உருவாகி வரும் '24' படத்தின் இசை ஏப்ரல் 2-ம் வாரத்திலும், படத்தை மே முதல் வாரத்திலும் வெளியிட படக்குழு திட்டமிட்டு இருக்கிறது.
விக்ரம் குமார் இயக்கத்தில் சூர்யா, சமந்தா, நித்யா மேனன் உள்ளிட்ட பலர் நடித்து வரும் படம் '24'. ஏ.ஆர்.ரஹ்மான் இசையமைத்து வரும் இப்படத்தை சூர்யா தனது 2டி நிறுவனம் மூலமாக தயாரித்து வருகிறார். ஸ்டூடியோ க்ரீன் நிறுவனம் இப்படத்தை வெளியிட இருக்கிறது.
இப்படத்தின் படப்பிடிப்பு முடிந்து இறுதிகட்டப் பணிகள் தீவிரமாக நடைபெற்று வருகிறது. இப்படத்தில் சுமார் 90% காட்சிகள் கிராபிக்ஸ் பின்னணியில் அமைத்திருக்கிறார் விக்ரம் குமார்.
கிராபிக்ஸ் காட்சிகளை இறுதி செய்யும் பணிகள் தற்போது நடைபெற்று வருகிறது. விரைவில் இப்பணி முடிவடையும் என்று தெரிவித்தார்கள்.
அதனைத் தொடர்ந்து படத்தை விளம்பரப்படுத்தும் பணியை துரிதப்படுத்த இருக்கிறார்கள். ஏப்ரல் 2ம் வாரத்தில் படத்தின் இசையை வெளியிட இருக்கிறார்கள். மே 6ம் தேதி படத்தை வெளியிட ஸ்டூடியோ க்ரீன் நிறுவனம் திட்டமிட்டு இருக்கிறது.