வெளியான 24 மணி நேரத்திற்குள் 20 லட்சம் பார்வையாளர்கள், அதிக விருப்பம் கொண்ட இந்தியா சினிமா டீஸர் என்ற சாதனையைப் படைத்திருக்கிறது 'தெறி' டீஸர்.
அட்லீ இயக்கத்தில் விஜய், சமந்தா, ஏமி ஜாக்சன், இயக்குநர் மகேந்திரன் உள்ளிட்ட பலர் நடிக்கும் 'தெறி' படத்தின் இறுதிகட்டப் பணிகள் தீவிரமாக நடைபெற்று வருகிறது. ஜி.வி.பிரகாஷ் இசையமைத்து வரும் இப்படத்துக்கு ஜார்ஜ் வில்லியம்ஸ் ஒளிப்பதிவு செய்திருக்கிறார். தாணு தயாரித்து வருகிறார். இது ஜி.வி. பிரகாஷ் இசையில் வெளிவரும் 50வது படம்.
இப்படத்தின் டீஸர் பிப்ரவரி 5ம் தேதி வெளியாகும் என படக்குழு அறிவித்தது. இரவு 12 மணியளவில் படத்தின் டீஸர் யூ-டியூப் தளத்தில் வெளியிடப்பட்டது. 'தெறி' படத்தின் டீஸர் ரசிகர்கள் மத்தியில் பெரும் வரவேற்பைப் பெற்றுள்ளது. மேலும், படத்தின் டீஸருக்கு யூ-டியூப் தளத்தில் விரும்புவர்கள் எண்ணிக்கை மற்றும் பார்த்தவர்களின் எண்ணிக்கை உயர்ந்து கொண்டே இருந்தது.
டீஸர் வெளியிடப்பட்ட 24 மணி நேரத்திற்குள் சுமார் 20 லட்சம் பார்வையாளர்களைக் கடந்து சாதனை படைத்திருக்கிறது 'தெறி' டீஸர். அதிக நபர்களால் விரும்பப்பட்ட இந்திய படத்தின் டீஸர் என்ற பெரும் சாதனையை படைத்திருக்கிறது. இதனால் படக்குழு மிகுந்த சந்தோஷத்தில் இருக்கிறது.
இதனிடையே, படத்தின் டீஸரில் உள்ள 'கன்டென்ட்' சிலவற்றுக்கு வேறொரு தளம் காப்புரிமை கோரியதால் யூடியூப் தளம் 'தெறி' டீஸரை நீக்கியது. பின்னர் தடை நீக்கப்பட்டு, டீஸர் அனுமதிக்கப்பட்டது.
படத்தின் டீஸரை முன்னதாக யூடியூப் தளத்தில் பார்த்தவர்களின் எண்ணிக்கையை உள்ளடக்கிய கணக்கோடு கொண்டுவர படக்குழு தீவிர முயற்சியில் இறங்கி மீட்டது குறிப்பிடத்தக்கது.