விஜய் நடித்திருக்கும் 'புலி' படத்தை வரிச்சலுகை அதிகாரிகள் பார்த்துவிட்டார்கள். வரிச்சலுகை உண்டா இல்லையா என்று இன்னும் அதிகாரிகள் தெரிவிக்கவில்லை.
சிம்புதேவன் இயக்கத்தில் விஜய் நடித்து முடித்திருக்கும் படம் 'புலி'. ஸ்ரீதேவி, ஹன்சிகா, ஸ்ருதிஹாசன், சுதீப் உள்ளிட்ட பல்வேறு நட்சத்திரங்கள் விஜய்யோடு நடித்திருக்கிறார்கள். தேவி ஸ்ரீபிரசாத் இசையமைத்து வரும் இப்படத்துக்கு நட்ராஜ் ஒளிப்பதிவு செய்திருக்கிறார். பி.டி.செல்வகுமார் மற்றும் தமீன் பிலிம்ஸ் இணைந்து தயாரித்து வருகிறார்கள்.
இப்படத்துக்கு சென்சார் அதிகாரிகள் 'யு' சான்றிதழ் அளித்திருக்கிறார்கள். அக்டோபர் 1ம் தேதி இப்படத்தை தமிழ், தெலுங்கு, இந்தி என மூன்று மொழிகளிலும் வெளியிட இருக்கிறார்கள்.
சென்சார் முடிந்துவிட்டால், வரிச்சலுகை அதிகாரிகளுக்கு படத்தை திரையிட்டு காட்டினார்கள். வரிச்சலுகை உண்டா, இல்லையா என்பதை இன்னும் அதிகாரிகள் தெரிவிக்கவில்லை. எப்படியாவது வரிச்சலுகை வாங்கி விட வேண்டும் என்ற தீவிர முயற்சியில் இறங்கியிருக்கிறது படக்குழு.
திரையுலகினர் மத்தியில் விசாரித்தபோது, "முன்னணி தொலைக்காட்சி நிறுவனத்துக்கு 'புலி' படத்தின் தொலைக்காட்சி உரிமையை அளித்துவிட்டார்கள். ஆளும் கட்சி தொலைக்காட்சி நிறுவனம் உரிமையை கைப்பற்றி இருந்தால் இந்நேரம் வரிச்சலுகை கிடைத்திருக்கும்" என்று தெரிவித்தார்கள்.