ஹன்சிகா நடித்து வரும் 'மஹா' படத்தில் சிம்புவின் லுக்கை வெளியிட்டுள்ளது படக்குழு.
ஹன்சிகாவின் 50-வது படம் ‘மஹா’. இந்தப் படத்தின் மூலம் இயக்குநராக அறிமுகமாகிறார் ஜமீல். இவர், ‘ரோமியோ ஜூலியட்’ மற்றும் ‘போகன்’ படங்களில் லட்சுமணனிடம் உதவி இயக்குநராகப் பணியாற்றியவர். இந்தப் படத்தின் ஃபர்ஸ்ட் லுக் போஸ்டரில், காவி உடை அணிந்து ஹன்சிகா புகை பிடிப்பது போல் புகைப்படம் இடம் பெற்றிருந்ததால் எதிர்ப்புக் கிளம்பியது குறிப்பிடத்தக்கது.
நாயகியை முன்னிலைப்படுத்திய இந்தக் கதையில் ஸ்ரீகாந்த், தம்பி ராமையா, நாசர், கருணாகரன், ஜெயப்பிரகாஷ், சாயா சிங் ஆகியோர் முக்கியக் கதாபாத்திரங்களில் நடிக்கின்றனர். ஜிப்ரான் இசையமைக்கிறார்.
இந்தப் படத்தில் முக்கியக் கதாபாத்திரத்தில் சிம்பு நடித்துள்ளார். காதல் முறிவுக்குப் பிறகு சிம்பு - ஹன்சிகா இணைந்து நடிக்கும் படம் இதுவாகும். இதில் சிம்பு - ஹன்சிகா காட்சிகள் கடந்த ஆண்டு படமாக்கப்பட்டன. விரைவில் இருவரும் சம்பந்தப்பட்ட விமானக் காட்சிகளைப் படமாக்கவுள்ளது படக்குழு.
இந்தப் படத்தில் சிம்புவின் லுக்கை தற்போது வெளியிட்டுள்ளது படக்குழு. இதன் மூலம் அவர் விமானியாக நடித்திருப்பது உறுதியாகியுள்ளது.