'தளபதி 64' படத்தில் விஜய்யுடன் முக்கியக் கதாபாத்திரத்தில் நடிக்க கெளரி கிஷன் ஒப்பந்தம் செய்யப்பட்டுள்ளார்.
'கைதி' படத்தைத் தொடர்ந்து விஜய் நடித்து வரும் படத்தை இயக்கி வருகிறார் லோகேஷ் கனகராஜ். இதில் மாளவிகா மோகனன், விஜய் சேதுபதி, ஆண்டனி வர்கீஸ் உள்ளிட்ட பலர் நடித்து வருகிறார்கள். சேவியர் பிரிட்டோ தயாரித்து வருகிறார்.
இதன் முதற்கட்டப் படப்பிடிப்பு சென்னையில் நடைபெற்றது. இதில் விஜய் குடித்துவிட்டு நடனமாடுவது போன்ற ஒரு பாடலைக் காட்சிப்படுத்தியுள்ளது படக்குழு. ’பிகில்’ மற்றும் 'கைதி' ஆகிய படங்களின் வெளியீடு இருந்ததால், படப்பிடிப்பை சில நாட்களுக்கு ஒத்தி வைத்தார்கள்.
தற்போது இரண்டு படங்களுமே வெற்றி என்பதால், மகிழ்ச்சியுடன் அடுத்தகட்டப் படப்பிடிப்புக்குத் தயாராகிவிட்டார்கள். டெல்லியில் நாளை (நவம்பர் 1) முதல் 'தளபதி 64' படத்தின் இரண்டாம் கட்டப் படப்பிடிப்பு தொடங்கவுள்ளது. இதில் படத்தின் பிரதான சண்டைக்காட்சிகளைப் படமாக்க முடிவு செய்துள்ளனர்.
மேலும், இந்தப் படத்தில் '96' படத்தின் மூலம் பிரபலமான கெளரி கிஷன் முக்கியக் கதாபாத்திரத்தில் நடிக்க ஒப்பந்தம் செய்யப்பட்டுள்ளார். அவர் விஜய்யின் கல்லூரி சம்பந்தப்பட்ட காட்சிகளில் நடிப்பார் எனத் தெரிகிறது.
அடுத்த ஆண்டு கோடை விடுமுறை வெளியீடு என்று அறிவித்துவிட்டதால், 2020-ம் ஆண்டு ஜனவரிக்குள் மொத்தப் படப்பிடிப்பையும் முடிக்கத் திட்டமிட்டுள்ளது படக்குழு. ஏப்ரல் 9-ம் தேதியை இப்போதைக்கு வெளியீட்டுத் தேதியாக முடிவு செய்துள்ளனர்.