வெற்றிமாறன் இயக்கத்தில் கதாநாயகனாகும் சூரி

'அசுரன்' படத்தைத் தொடர்ந்து வெற்றிமாறன் இயக்கத்தில் உருவாகவுள்ள புதிய படத்தின் கதாநாயகனாக நடிக்க சூரி ஒப்பந்தமாகியு

தனுஷ், மஞ்சு வாரியர், இயக்குநர் பாலாஜி சக்திவேல், பசுபதி உள்ளிட்ட பலர் நடிப்பில் உருவாகி வரும் படம் 'அசுரன்'. தாணு தயாரித்து வரும் இந்தப் படத்தை வெற்றிமாறன் இயக்கி வருகிறார். 'வெக்கை' நாவலை மையப்படுத்தி இந்தப் படம் உருவாகி வருகிறது.

கோவில்பட்டியைச் சுற்றி நடைபெற்று வந்த இந்தப் படத்தின் படப்பிடிப்பு இறுதிக் கட்டத்தை எட்டியுள்ளது. இன்னும் 10 நாட்கள் மட்டுமே படப்பிடிப்பு இருக்கிறது. அதையும் விரைவில் துவங்க படக்குழு ஆயத்தமாகி வருகிறது. 

இதனிடையே  தன் அடுத்த படத்துக்கு ஆயத்தமாகி வருகிறார் இயக்குநர் வெற்றிமாறன். படத்தை எல்ரெட் குமார் தயாரிக்கவுள்ளார். இதில் நாயகனாக நடிக்க நகைச்சுவை நடிகர் சூரி ஒப்பந்தமாகியுள்ளார். குடும்பப் பின்னணி கொண்ட நகைச்சுவை படமாக பெரும் பொருட்செலவில் உருவாகவுள்ளது. இது தொடர்பான அதிகாரப்பூர்வ அறிவிப்பு இன்று (ஜூலை 27) வெளியாகியுள்ளது. 

'சீமராஜா' படத்தில் தனது கதாபாத்திரத்துக்காக ‘சிக்ஸ் பேக்’ வைத்தார் சூரி. அப்போது எடுத்த போட்டோ ஷுட் புகைப்படங்கள் வெளியானது, இதையடுத்து பல முன்னணி இயக்குநர்கள் அவரை நாயகனாக வைத்து படமெடுக்க அணுகினார்கள். ஆனால், சூரி எந்தவொரு படத்தையும் ஒப்புக் கொள்ளவில்லை. வெற்றிமாறன் அணுகியவுடனே நாயகனாக நடிக்க சம்மதித்துள்ளார். இந்தப் படம் கண்டிப்பாக தன் திரையுலக பயணத்தை மாற்றியமைக்கும் என்ற நம்பிக்கையில் இருக்கிறார் சூரி.