புதுமுக இயக்குநர் மனு ஆனந்த் இயக்கத்தில் விஷ்ணு விஷால் - மஞ்சிமா மோகன் இணைந்து நடிக்கும் படத்துக்கு 'எஃப்.ஐ.ஆர்' எனத் தலைப்பு வைக்கப்பட்டுள்ளது.
'சிலுக்குவார்பட்டி சிங்கம்' படத்தைத் தொடர்ந்து விஷ்ணு விஷால் நடிப்பில் உருவாகியுள்ள படம் 'ஜகஜால கில்லாடி'. இந்தப் படத்தின் பணிகள் அனைத்தும் முடிவடைந்து, படம் விரைவில் வெளியாகவுள்ளது. இதனைத் தொடர்ந்து தன் பிறந்த நாளன்று புதிய படமொன்றை அறிவித்துள்ளார் விஷ்ணு விஷால்.
இந்தப் படத்தை கவுதம் மேனனிடம் உதவி இயக்குநராகப் பணிபுரிந்த மனு ஆனந்த் இயக்கவுள்ளார். மஞ்சிமா மோகன், கருணாகரன் உள்ளிட்ட பலர் விஷ்ணு விஷாலுடன் நடிக்க ஒப்பந்தம் செய்யப்பட்டுள்ளனர். இந்தப் புதிய படத்தின் ஃபர்ஸ்ட் லுக் போஸ்டர் இணையத்தில் வெளியிடப்பட்டது.
அப்போஸ்டரில் 'FIR' என்று ஆங்கிலத்தில் பெயர் இடம்பெற்றுள்ளது. இதற்கு 'ஃபைசல் இப்ராஹிம் ரய்ஸ்' என்று அர்த்தம் என படக்குழு குறிப்பிட்டுள்ளது . போஸ்டர் வடிவமைப்பே தீவிரவாதம் சம்பந்தப்பட்டு வடிவமைக்கப்பட்டு இருந்தது. இதன் படப்பிடிப்பு விரைவில் தொடங்கவுள்ளது.
இதைத் தொடர்ந்து விக்ராந்துடன் நடிக்கும் புதிய படம், 'இன்று நேற்று நாளை 2', 'ஜெர்ஸி' தமிழ் ரீமேக், 'ஜீவி' இயக்குநரின் அடுத்த படம், 'காடன்', வசந்தபாலன் இயக்கத்தில் உருவாகும் படம் என பல்வேறு படங்களில் ஒப்பந்தமாகியுள்ளார் விஷ்ணு விஷால்.