ராம் இயக்கத்தில் மம்மூட்டி, அஞ்சலி நடிக்கவிருக்கும் படத்துக்கு 'பேரன்பு' என தலைப்பிட்டு இருக்கிறார்கள்.
வசந்த் ரவி, ஆண்ட்ரியா உள்ளிட்ட பலர் நடிப்பில் 'தரமணி' படத்தை இயக்கி வருகிறார் இயக்குநர் ராம். யுவன் இசையமைத்து வரும் இப்படத்தை கோபிநாத், ராம், சதீஷ்குமார் மூவரும் இணைந்து தயாரித்து வருகிறார்கள்.
தேனி ஈஸ்வர் ஒளிப்பதிவு செய்துவரும் இப்படத்திற்கு ஸ்ரீகர் பிரசாத் எடிட்டிங் செய்கிறார். இப்படத்தின் இறுதிகட்டப் படப்பிடிப்பு தற்போது நடைபெற்று வருகிறது. விரைவில் இசை வெளியீடு செய்து, படத்தை கோடை விடுமுறைக்கு வெளியிடத் திட்டமிட்டு இருக்கிறார்கள்.
'தரமணி' படத்தின் இறுதிகட்ட பணிகள் தொடங்கப்பட்டு விட்டதால், தனது அடுத்த படத்தில் கவனம் செலுத்த ஆரம்பித்துவிட்டார் இயக்குநர் ராம். இப்படத்தில் மம்மூட்டி, அஞ்சலி, 'தங்கமீன்கள்' சாதனா ஆகியோர் நடிக்க ஒப்பந்தமாகி இருக்கிறார்கள். இப்படத்தை பி.எல்.தேனப்பன் தயாரிக்க இருக்கிறார்.
இப்படத்தின் படப்பிடிப்பை குறுகிய காலத்தில் முடிக்க திட்டமிட்டு இருக்கிறார் இயக்குநர் ராம். ஒளிப்பதிவாளராக தேனி ஈஸ்வர், இசையமைப்பாளராக யுவன், பாடலாசிரியராக நா.முத்துக்குமார் ஆகியோர் ஒப்பந்தம் செய்யப்பட்டு இருக்கிறார்கள். இப்படத்துக்கு 'பேரன்பு' என்று பெயரிட்டு இருக்கிறார்கள்.
ஜனவரி 6ம் தேதி முதல் கொடைக்கானலில் படப்பிடிப்பு தொடங்க படக்குழு திட்டமிட்டு இருக்கிறது.