'ரெமோ', 'கவலை வேண்டாம்', 'தேவி' ஆகிய படங்களைத் தொடர்ந்து ஆயுத பூஜை விடுமுறை வெளியீட்டில் 'றெக்க' படமும் இணைந்துள்ளது.
ரத்தின சிவா இயக்கத்தில் அருண்விஜய் நடிப்பில் நீண்ட நாட்களாக தயாரிப்பில் இருந்து வந்த 'வா டீல்' ஆகஸ்ட் 25ம் தேதி வெளியாக இருக்கிறது. அப்படத்தைத் தொடர்ந்து 'றெக்க' படத்தை இயக்கி வருகிறார்.
விஜய் சேதுபதி, லட்சுமி மேனன், ஹரிஷ் உத்தமன் உள்ளிட்ட பலர் நடித்து வரும் இப்படத்தை சதீஷ் தயாரித்து வருகிறார். தாய்லாந்தில் பாடல் படப்பிடிப்பை முடித்துவிட்டு திரும்பி இருக்கிறது படக்குழு. விரைவில் இறுதிகட்ட படப்பிடிப்பை தொடங்க திட்டமிட்டு இருக்கிறார்கள்.
இப்படத்தின் தமிழக வெளியீட்டு உரிமையை சிவபாலன் பிக்சர்ஸ் நிறுவனம் கைப்பற்றி இருக்கிறது. இந்நிறுவனம் ஆயுத பூஜை விடுமுறை நாட்களை கணக்கில் கொண்டு, அக்டோபர் 7ம் தேதி 'றெக்க' வெளியாகும் என்று அறிவித்திருக்கிறது.
ஏற்கனவே 'ரெமோ', 'கவலை வேண்டாம்', 'தேவி' ஆகிய படங்கள் அக்டோபர் 7ம் தேதி வெளியாகும் என்று அறிவித்திருக்கிறார்கள். அவற்றோடு 'றெக்க' படமும் இணைந்துள்ளது. 4 படங்களுமே பெரிய முதலீடு படங்கள் என்பதால், அதற்கு ஏற்ற எண்ணிக்கையில் திரையரங்குகள் இருக்கிறதா என்று பெரும் கேள்வி எழுந்துள்ளது. மேலும், இந்த 4 படங்களுள் எவையேனும் 2 படங்கள் பின்வாங்கும் என்று தகவல் வெளியாகியுள்ளது.