ராகவா இயக்கத்தில் ஆர்யா நடித்துள்ள 'கடம்பன்' ஏப்ரல் 14ம் தேதி வெளியாகும் என படக்குழு அறிவித்துள்ளது.
பெங்களூர் நாட்கள்' படத்துக்குப் பிறகு, ராகவா இயக்கத்தில் உருவான 'கடம்பன்' படத்தில் நடித்து வந்தார் ஆர்யா. கேத்ரீன் தெரசா, சூப்பர் சுப்பராயன் உள்ளிட்ட பலர் நடித்துள்ள இப்படத்தை சூப்பர் குட் பிலிம்ஸ் நிறுவனம் தயாரித்து வருகிறது.
இப்படத்திற்காக முன்பு எப்போதும் இல்லாத வகையில் தனது உடலமைப்பை மாற்றி நடித்து வந்தார் ஆர்யா. 'கடம்பன்' என பெயரிட்டுள்ள இதற்கு யுவன் இசையமைத்து வருகிறார்.
இப்படத்தின் பெரும்பகுதி காட்சிகளை காட்டுக்குள் படப்பிடிப்பு நடத்தியுள்ளார். சமீபத்தில் வெளியிடப்பட்ட ட்ரெய்லருக்கு பெரும் வரவேற்பு கிடைத்துள்ளது.
இதன் இறுதிகட்ட பணிகள் துரிதமாக நடைபெற்று வந்தது. கிராபிக்ஸ் காட்சிகள் அதிகமாக இருந்ததால் வெளியீடு தாமதமாகி வந்தது. தற்போது ஏப்ரல் 14ம் தேதி இப்படம் வெளியாகும் என படக்குழு அதிகாரப்பூர்வமாக அறிவித்துள்ளது.
தமிழகமெங்கும் இப்படத்தை ஆர்யாவின் 'தி ஷோ பீப்பிள்' நிறுவனம் வெளியிட இருக்கிறது. 'கடம்பன்' படத்தைத் தொடர்ந்து அமீர் இயக்கும் 'சந்தனத்தேவன்' படத்தில் கவனம் செலுத்தி வருகிறார் ஆர்யா.
லாரன்ஸ் நடித்துள்ளா 'சிவலிங்கா', தனுஷ் இயக்கியுள்ள 'பவர் பாண்டி' ஆகிய படங்களும் ஏப்ரல் 14ம் தேதி வெளியாகவிருப்பது குறிப்பிடத்தக்கது.