ஷங்கர் இயக்கத்தில் கமல் நடிக்கும் ’இந்தியன் 2’ படத்தின் படப்பிடிப்பு தொடங்கப்பட்டுள்ளது. இதற்காக இணையத்தில் வாழ்த்துகள் குவிந்து வருகின்றன.
கமல்ஹாசன் நடிப்பில், ஷங்கர் இயக்கத்தில் வெளியான படம் ‘இந்தியன்’. அப்பா - மகன் என இரண்டு வேடங்களில் கமல் நடித்திருந்தார். இப்படம்தான் கமல் - ஷங்கர் இணைந்து பணியாற்றிய கடைசிப் படம்.
தற்போது 22 வருடங்கள் கழித்து, 'இந்தியன் 2' படப்பிடிப்பு இன்று (ஜனவரி 18) தொடங்கப்பட்டுள்ளது. லைகா நிறுவனம் பெரும் பொருட்செலவில் தயாரிக்கும் இப்படத்தில் கமல், காஜல் அகர்வால் ஒப்பந்தம் செய்யப்பட்டுள்ளனர். ஷங்கர் இயக்கும் இப்படத்துக்கு அனிருத் இசையமைக்கிறார். ரவி வர்மன் ஒளிப்பதிவு செய்யவுள்ளார்.
சமீபத்தில் வெளியிடப்பட்ட 'இந்தியன் 2' ஃபர்ஸ்ட் லுக் போஸ்டருக்கு இணையத்தில் பெரும் வரவேற்பைப் பெற்றது. மேலும், இன்று (ஜனவரி 18) படப்பிடிப்பு தொடங்கியதை முன்னிட்டு புதிய போஸ்டர்களை படக்குழு வெளியிட்டுள்ளது.
இப்படத்துக்காக தனது அரசியல் பணிகளுக்கு இடையே, உடலமைப்பை மாற்றியமைத்துள்ளார் கமல். பொள்ளாச்சி, சென்னை, ஹைதராபாத் மற்றும் பல வெளிநாடுகளிலும் படப்பிடிப்பு நடத்த படக்குழு முடிவு செய்துள்ளது. எழுத்தாளர்கள் ஜெயமோகன், கபிலன் வைரமுத்து, லட்சுமி சரவணகுமார் மூவரும் இணைந்து ‘இந்தியன் 2’வுக்கான வசனங்களை எழுதியுள்ளனர்.
மீண்டும் சேனாதிபதியாக கமல் நடிக்கவுள்ளதற்கு இணையத்தில் வாழ்த்துகள் குவிந்து வருகின்றன. மேலும், இது தான் தனது கடைசிப் படமாக இருக்கும் என்று கமல் அறிவித்திருப்பது குறிப்பிடத்தக்கது.