சத்யராஜ் நடிக்கும் ‘தீர்ப்புகள் விற்கப்படும்’ படத்தின் ஃபர்ஸ்ட் லுக்கை திருமுருகன் காந்தி வெளியிட்டார்.
சத்யராஜ் நடிக்கும் அடுத்த படத்துக்கு ‘தீர்ப்புகள் விற்கப்படும்’ எனத் தலைப்பு வைக்கப்பட்டுள்ளது. தீரன் இயக்கும் இந்தப் படத்துக்கு, ‘கருட வேகா’ தெலுங்குப் படத்துக்கு ஒளிப்பதிவு செய்த ஆஞ்சி ஒளிப்பதிவு செய்கிறார். எஸ்.என்.பிரசாத் இசையமைக்க, சரத் எடிட் செய்கிறார்.
“உண்மையான நிகழ்வுகளை அடிப்படையாகக் கொண்டது இந்தப் படம். சமூக விஷயங்களை உள்ளடக்கிய தரமான பொழுதுபோக்குப் படத்தை வழங்கும் எங்கள் நோக்கம், இந்த ஆக்ஷன் த்ரில்லர் படத்தின் மூலம் தெரியவரும். இந்தப் படம், ரசிகர்களை இருக்கையின் நுனியில் வைத்திருக்கும் என்று நாங்கள் நம்புகிறோம்.
படத்தின் கதாநாயகன் சமூக நீதியின் போர்வீரன். சத்யராஜ் சார் சமரசமற்ற மனோபாவம் கொண்ட ஒரு மனிதர் என்ற ரீதியில் ஒரே தேர்வாக இருந்தார். நான் அவரது எளிமை, அவரது முயற்சியால் ஈர்க்கப்பட்டேன்” என்கிறார் இயக்குநர் தீரன்.
இந்தப் படத்தின் ஃபர்ஸ்ட் லுக் போஸ்டரை வெளியிட்டுள்ளார் ‘மே 17’ இயக்கத்தின் ஒருங்கிணைப்பாளரான திருமுருகன் காந்தி. அடுத்த மாதம் (டிசம்பர்) இதன் படப்பிடிப்பு தொடங்க உள்ளது.