‘டான்’ படத்துடன் ஓப்பிட்டு வந்த கருத்துகளுக்கு ‘டிராகன்’ இயக்குநர் விளக்கம் அளித்துள்ளார்.
இணையத்தில் ‘டிராகன்’ படத்தின் ட்ரெய்லருக்கு நல்ல வரவேற்பு கிடைத்துள்ளது. அதே வேளையில் பலரும் இதனை ‘டான்’ படத்துடன் ஓப்பிட்டு கருத்துகள் தெரிவித்து வருகிறார்கள். ‘டிராகன்’ படத்தினை விளம்பரப்படுத்த படக்குழுவினர் பேட்டியளித்து வருகிறார்கள். அதில் இயக்குநர் அஸ்வத் மாரிமுத்துவிடம் ‘டான்’ படத்துடனான ஓப்பீடு குறித்து கேள்வி எழுப்பப்பட்டது.
அதற்கு பதில் அளித்த அஸ்வத் மாரிமுத்து, “டான் படம் வெளியாகி இரண்டு ஆண்டுகளாகிறது. அதே படத்தை யாரேனும் திரும்ப எடுப்பார்களா?. ‘ஓ மை கடவுளே’ என்ற மக்களுக்கு பிடித்த படத்தை இயக்கியவன் நான். பிரதீப் ரங்கநாதனோ ‘லவ் டுடே’ என்ற ரூ.100 கோடி வசூல் கொண்ட படத்தை இயக்கி நடித்தவர். நாங்கள் இணைந்து ஏன் ‘டான் 2’ எடுக்கப் போகிறோம்?
கல்லூரி, நிறைய மாணவர்கள், கலர்ஃபுல்லான காட்சிகள் என பார்க்கும்போது ‘டான்’ மாதிரி தெரிகிறது. அப்படத்தின் கதை என்ன, கல்லூரியில் அராஜமாக இருக்கும் ஒருத்தன் எப்படி வாழ்க்கையில் ஜெயிக்கிறான் என்பதுதான். ஆனால் ‘டிராகன்’ கதை அதுவல்ல. படத்தில் பெரிய சர்ப்ரைஸ் ஒன்று உள்ளது. அதை படத்தின் ட்ரெய்லரில் இருந்து மறைத்துவிட்டோம்.
படம் வெளியான உடன் இப்படி பேசிய அனைவருமே மாற்றிப் பேசுவார்கள். ‘ஓ மை கடவுளே’ எப்படி வித்தியாசமாக இருந்ததோ, அதே மாதிரிதான் ‘டிராகன்’ படமும் வித்தியாசமாக இருக்கும். அடுத்த சிம்பு படத்தின் கதையும் வித்தியாசமானது தான்” என்று தெரிவித்துள்ளார்.
ஏஜிஎஸ் நிறுவனம் தயாரித்துள்ள ‘டிராகன்’ படத்தில் பிரதீப் ரங்கநாதன், அனுபமா பரமேஸ்வரன், கயாடு லோகர், மிஷ்கின், கே.எஸ்.ரவிக்குமார், கவுதம் மேனன் உள்ளிட்ட பலர் நடித்துள்ளனர். அஸ்வத் மாரிமுத்து இயக்கியுள்ள இப்படத்துக்கு லியோன் ஜேம்ஸ் இசையமைத்துள்ளார். பிப்ரவரி 21-ம் தேதி இப்படம் திரைக்கு வரவுள்ளது.