‘தருணம்’ படத்தை வேறொரு தேதியில் வெளியிட படக்குழு முடிவு

‘தருணம்’ படத்துக்கு காட்சிகள் குறைவாக கிடைத்ததால், படத்தினை வேறொரு தேதியில் வெளியிட முடிவு செய்திருக்கிறார்கள்.

அரவிந்த் இயக்கத்தில் கிஷன் தாஸ் நடிப்பில் வெளியான படம் ‘தருணம்’. இப்படத்துக்கு குறைவான திரையரங்குகளே கிடைத்தது. அதில் காட்சிகள் 2, 3 என கொடுக்கப்பட்டது. இதனால் படக்குழுவினர் பெரும் அதிருப்தி அடைந்தார்கள். இதனை முன்னிட்டு படத்தினை தூக்கிவிட்டார்கள்.

விரைவில் வேறொரு தேதியில் படத்தினை வெளியிடலாம் என்று படக்குழுவினர் முடிவு செய்திருக்கிறார்கள். தற்போது படக்குழுவினர் செலவழித்த பணம் அனைத்துமே வீணாகிவிட்டாலும், படத்தின் மீதுள்ள நம்பிக்கையில் இந்த முடிவினை எடுத்திருக்கிறார்கள். அதுமட்டுமன்றி, இப்படியொரு சூழல் தமிழ் சினிமாவில் நிகழ்வது இதுவே முதன்முறையாகும்.

தற்போதைய சூழலில் தமிழகமெங்கும் ‘மதகஜராஜா’ படத்துக்கு மக்களிடையே மாபெரும் வரவேற்பு கிடைத்திருக்கிறது. ஆகையால் அவற்றுக்கே திரையரங்க உரிமையாளர்கள் முன்னுரிமை கொடுத்துள்ளனர். மற்ற படங்களான ‘கேம் சேஞ்சர்’, ‘வணங்கான்’, ‘காதலிக்க நேரமில்லை’ மற்றும் ‘நேசிப்பாயா’ அனைத்துக்கு மிக குறைந்தளவிலான திரையரங்குகளே கிடைத்திருப்பது குறிப்பிடத்தக்கது.