விக்ரமின் அடுத்த படத்தினை மடோன் அஸ்வின் இயக்க ஒப்பந்தமாகி இருக்கிறார்.
விக்ரம் நடித்துள்ள ‘வீர தீர சூரன்’ டீசர் சமீபத்தில் வெளியிடப்பட்டது. இதற்கு இணையத்தில் நல்ல வரவேற்பு கிடைத்துள்ளது. ஜனவரி 24-ம் தேதி வெளியிட படக்குழு முடிவு செய்திருக்கிறது. அப்படத்துக்கு பிறகு யாருடைய இயக்கத்தில் விக்ரம் நடிக்கவுள்ளார் என்ற கேள்வி எழுந்தது.
தற்போது ‘மண்டேலா’, ‘மாவீரன்’ ஆகிய படங்களை இயக்கிய மடோன் அஸ்வின் இயக்கத்தில் விக்ரம் நடிக்கவிருப்பது உறுதியாகி இருக்கிறது. இதனை ‘மாவீரன்’ படத்தை தயாரித்த சாந்தி டாக்கீஸ் நிறுவனமே தயாரிக்கவுள்ளது. இதற்கான ஒப்பந்தம் கையெழுத்தாகி இருக்கிறது. விரைவில் இப்படம் குறித்த அதிகாரபூர்வ அறிவிப்பு வெளியாகவுள்ளது.
அஸ்வின் தவிர்த்து பல்வேறு இயக்குநர்களிடம் கதைகள் கேட்டுள்ளார் விக்ரம். அதற்குப் பிறகு யாருடைய இயக்கத்தில் நடிக்கவுள்ளார் என்பது விரைவில் தெரியவரும்.